ليه متابعة دورتك الشهرية حاجة مهمة؟
لمتابعة صحتك:
متابعة الدورة الشهرية هتخليكي تفهمي جسمك أكتر وتفهمي نمط دورتك الشهرية وتقدري تلاحظي لو في أي تغييرات مش طبيعية أو مش متعودة عليها وبتحصل بشكل مستمر لكذا شهر.
في الحالة دي هيكون أفضل إنك تستشيري دكتور متخصص لأن ده ممكن يكون دليل على وجود مشكلة صحية زي لخبطة في الهرمونات أو متلازمة تكيس المبايض أو التهاب في الرحم أو مشكلة في الغدة الدرقية أو في حالات زي بطانة الرحم المهاجرة والأورام الليفية في الرحم.
كل الحاجات دي ممكن يتم اكتشافها بسرعة وبالتالي يتم علاجها بدري.
كمان متابعة الدورة الشهرية لو احتجتي تستشيري دكتور متخصص هتخليكي تجاوبي على أسئلة الدكتور بشكل احسن لو الأسئلة متعلقة بمواعيد الدورة او أي تغييرات عن النمط الطبيعي وده هيساعد الدكتور يشخص المشكلة بشكل احسن و أدق بكتير.
معرفة أوقات التبويض كمان هتساعدك تحققي أهدافك الإنجابية سواء كانت الحمل عن طريق إنك تهتمي بالعلاقة الزوجية في الفترة دي أو لو بتحاولي تأجلي الحمل هتعرفي كمان إمتى تاخدي احتياطاتك أو تستخدمي وسائل منع الحمل بشكل أنسب.
لحياتك العملية:
متابعة الدورة الشهرية هتخليكي تعرفي الميعاد اللي هتحصل فيه وتعملي حسابك عن طريق إن يكون في شنطتك فوط صحية مثلا أو تتوقعي إن مزاجك ممكن يكون فيه تغييرات مش لطيفة أو احتمالية إنك تحسي بشوية وجع في الصدر أو الظهر ولو في أطعمة معينة بتحاولي تقلليها في أوقات الدورة هتعرفي كمان ترتبي لده من بدري.