بطانة الرحم المهاجرة و علاقتها بالدورة الشهرية

من الأعراض الشائعة وقت الدورة الشهرية هو ألم أسفل البطن وتقلصات، وده بيحصل نتيجة لانقباضات الرحم بسبب تغيّر الهرمونات وارتفاع مادة اسمها “البروستاجلاندين”. شدة الألم ومدته بتختلف من بنت للتانية، وده بيخلي التفرقة بين الألم الطبيعي والألم الناتج عن مشكلة صحية زي بطانة الرحم المهاجرة (إندومتريوزيس) مش سهلة، خصوصًا مع تشابه الأعراض مع أعراض الدورة الشهرية العادية.

علشان كده، بنات كتير بيعيشوا لسنين فاكرين إن الألم اللي بيحسّوا بيه “طبيعي” أو علامة على الخصوبة، مع إنه ممكن يكون مؤشر على مشكلة صحية محتاجة متابعة وتشخيص.

ايه هي بطانة الرحم المهاجرة؟

ده مرض بيتميّز بشكل أساسي بوجود ألم مزمن ومُرهِق متزامن مع وقت الدورة الشهرية، وده واحد من أهم أعراضه. الألم المرتبط ببطانة الرحم المهاجرة مش مجرد وجع دورة “شديد شوية”، ده وجع ممكن يبدأ قبل الدورة بأيام، ويستمر بعدها، عشان كده مهم نكون عارفين مقياسنا الشخصي للألم الطبيعي، وإمتى الألم بيكون زيادة عن المعتاد أو بيأثر على حياتنا اليومية، لأن في الحالة دي بنكون محتاجين نلجأ لاستشارة طبية.

بطانة الرحم المهاجرة هي حالة بيحصل فيها نمو غير طبيعي لأنسجة شبيهة ببطانة الرحم، بس بدل ما تكون جوه الرحم، بتكون موجودة في أماكن تانية في الجسم. النسيج ده بنسميه “إندومتريوما”، وممكن يتزرع في أماكن مختلفة زي المبايض (وده المكان الأكتر شيوعًا)، أو في قناة فالوب، أو حتى في المثانة أو الأمعاء، وفي حالات نادرة ممكن يوصل أماكن أبعد في الجسم.

النسيج ده بيكون حساس للهرمونات زي بطانة الرحم العادية، يعني بيكبر ويتفاعل مع كل دورة شهرية بنفس الطريقة، ولما مستوى الهرمونات يقل في آخر الدورة، النسيج ده بيحاول ينزل أو ينزف زيه زي بطانة الرحم، بس المشكلة إن مفيش مكان يخرج منه الدم ده، فبيتجمع حوالين الأنسجة ويسبب التهابات، وألم شديد، وفي بعض الحالات ممكن يكوّن تليفات أو أكياس دموية على المبيضين (اسمها أكياس شوكولاتة).

في الحقيقة، لما الألم يكون شديد لدرجة إنه بيوقفك عن شغلك أو دراستك، أو بيسببلك إرهاق مستمر، و بيبدأ قبل الدورة بكذا يوم وبيكمل بعدها، لو بينزل دم الدورة عزير و فيه كتل زي الكبدة، أو لما يكون فيه ألم أثناء العلاقة الحميمة أو أثناء التبول أو دخول الحمام – الحاجات دي كلها ممكن تكون علامات إن في حاجة أكتر من مجرد “وجع دورة” و محتاجة استشارة طبية.

عشان كده، مهم جدًا نكون عارفين جسمنا ونراقب التغيرات، ونطلب المساعدة الطبية لو حسينا إن في حاجة مش طبيعية. التشخيص المبكر ممكن يساعد في تقليل الألم وتحسين جودة الحياة بشكل عام.

استفيدى بخصم “عزيزة” وجرّبي البريود اندروير لايام الغزيرة من شمسي هنا