الأكل الصح في الوقت الصح

فهم دورتك الشهرية مفتاح لعلاقة أعمق مع صحتك. الدورة الشهرية مش مجرد حدث شهري؛ هي خريطة واضحة لجسمك بتساعدك تفهميه وتدعميه في كل مرحلة بطريقة تناسب احتياجاتك. مهم اننا نكون علاقة صحية ومتوازنة مع الأكل. ده معناه إننا نبص للأكل على إنه وسيلة لدعم صحتنا، مش مجرد حاجة بنلجأ لها وقت الجوع أو للتسلية.

مع كل مرحلة في دورتك الشهرية، جسمك و هرموناتك و طاقة جسمك بتتغير. لما تنسقي نظام أكلك مع التغيرات دي، هتلاقي نفسك بتدعمي جسمك وبتتحكمي في مودك وأعراضك بشكل أفضل.

ايه الاكل المناسب لكل مرحلة و ايه الاكل الي ابعد عنه؟

١. مرحلة الحيض في مرحلة الحيض بيكون مستوى الطاقة قليل، وممكن يحصل فقدان للحديد لو النزيف كان كتير. علشان كده ببنصح بالتركيز على الأكلات الغنية بالحديد زي السبانخ، الكرنب، العدس، واللحوم الحمراء. الأكلات المضادة للالتهاب زي شاي الجنزبيل والكركم مفيدة جدًا لتخفيف التقلصات. تجنبي الكافيين بكميات كبيرة زي القهوة والشوكولاتة لأنها ممكن تزود التقلصات، وابعدي عن الأطعمة المصنعة، خصوصًا اللي فيها نسبة عالية من السكر والدهون الحيوانية.

٢.مرحلة التجهيز: في المرحلة دي بيبدأ الأستروجين يزيد، ومستوى الطاقة وتركيزك بيعلى. بننصح بالتركيز على البروتين والدهون الصحية زي البيض، الأفوكادو، المكسرات، والبذور لدعم نمو الخلايا. الأكلات الغنية بالبروبيوتيك زي العدس والكينوا والزبادي البروبيوتيك مفيدة لدعم الهضم وتوازن الهرمونات.

٣. مرحلة التبويض: في مرحلة التبويض، مستويات الطاقة بتزيد بسبب وصول الأستروجين لأعلى مستوى. في المرحلة ديه، يُفضل التركيز على الأكلات الغنية بمضادات الأكسدة زي التوت، الفواكه الحمضية، والفلفل. شرب كمية كافية من المياه مهم جدًا لتجنب الانتفاخ. تجنبي الأطعمة المالحة زي المخللات والشيبسي لأنها ممكن تسبب احتباس السوائل.

٤.المرحلة اللوتينية (الجسم الأصفر): في المرحلة دي، ممكن تلاحظي أعراض زي الانتفاخ أو الرغبة الشديدة في السكريات. فركزي على الأكلات الغنية بالمغنيسيوم (زي الشوكولاتة الداكنة، بذور اليقطين، واللوز) لتخفيف التقلصات وتحسين المزاج. و الكربوهيدرات المعقدة (زي البطاطا ، واللرز البني) عشان تظبط مستوى السكر في الدم والأوميجا 3 (زي السلمون، عين الجمل، وبذور الكتان) لتقليل الالتهابات. تجنبي الوجبات الخفيفة المصنعة بشكل كبير اللي فيها سكر، ملح، ودهون كتير لانها بتزود من أعراض ما قبل الحيض.

الاحتياجات الغذائية معقدة وبتتأثر بعوامل مختلفة زي جيناتك، والتمثيل الغذائي، وصحتك العامة. بالرغم إن دورتك الشهرية ليها دور كبير في نظامك الغذائي واحتياجاتك، إلا إنها مجرد عامل واحد من عوامل كتير لازم تكوني واخدة بالك منها. مراقبة تجاربك خلال الدورة الشهرية وتسجيل أي تغيرات في رغباتك في الأكل أو شهيتك ممكن يساعدك في فهم الأطعمة اللي تنفعك والأطعمة اللي مش بتناسبك.