الخرافات حول الدورة الشهرية: الحقيقة وراء الشائعات

كتير مننا سمعوا معلومات عن الدورة الشهرية واتربوا على تصديقها من غير ما نفكر هي صح ولا غلط. للأسف، فيه خرافات كتير حوالين الدورة الشهرية ممكن تخلي البنات والستات يحسوا بالإحراج أو القلق أو حتى يتعاملوا مع أعراضهم بطريقة تضرهم.

هنسلط الضوء على المفاهيم الخاطئة المنتشرة عن الدورة الشهرية، ونوضح الحقائق العلمية اللي وراها.

ا. خرافة: متستحميش خلال الحيض:

المعلومة دي منتشرة كتير رغم ان مفيش سبب علمي لتجنب الاستحمام أثناء الدورة الشهرية أو حتى غسل الشعر. على العكس تماما، الحمام/الشاور بيساعدك تحافظي على نظافتك الشخصية وتتجنبي اي روايح مش حلوة. فيه كمان اعتقاد شائع إن الحموم بالمياه السخنة وقت الدورة الشهرية بيزود النزيف، لكن الحقيقة ان المياه السخنة بتساعد على زيادة تدفق الدم بشكل طبيعي في الجسم، وده مش حاجة مقلقة. بالعكس، ده ممكن يخفف التقلصات الناتجة عن الدورة الشهرية.

٢. خرافة : ممنوع ممارسة الرياضة أثناء الدورة الشهرية

كتير بيقولوا إنك لازم توقفي أي نشاط رياضي وقت الدورة الشهرية، بس الحقيقة العكس تمامًا، لو بتعاني من تقلصات أو تعب، الرياضة الخفيفة زي المشي، السباحة، أو اليوجا بتساعد في تخفيف الألم وتحسين المزاج بسبب الإندورفين اللي جسمك بيفرزه وقت الرياضة. كمان التمارين المنتظمة على المدى الطويل ممكن تقلل حدة التقلصات وتنظم الدورة.

٣. خرافة: دم الحيض مش نظيف /ملوث

كتير بيقولوا إن دم الحيض “فاسد”، لكن الحقيقة إن دم الحيض زيه زي أي دم أو سوائل تانية في الجسم. الدم ده بيخرج من الرحم وبيتكون من أنسجة وبطانة الرحم اللي بتتجدد بشكل طبيعي كل شهر. المهم إنك تحافظي على النظافة الشخصية وتستخدمي منتجات آمنة و من غير روائح، لكن ده مش معناه إن دم الحيض نفسه مش نظيف.

٤. خرافة: ممكن يغمى عليكي بسبب فقدان الدم

كمية دم الدورة غالبًا أقل بكتير من اللي بنفتكره، في المتوسط بتفقدي حوالي ملعقتين لـ ٨ ملاعق من الدم في الدورة . لكن لو بتعاني من نزيف غزير جدًا، وده بيخليكي تحسي بدوخة أو ضعف، يبقى لازم تستشيري دكتور. غزارة الطمث مش شائعة جدًا، لكن لو حصلت، علاجها بسيط ومهم.

٥. خرافة: مستحيل الحمل أثناء الدورة الشهرية

مع إن فرص الحمل في وقت الدورة قليلة، لكنها مش مستحيلة. الحيوانات المنوية ممكن تعيش جوه الرحم لأيام ، ولو دورتك قصيرة أو غير منتظمة، ممكن يحصل تبويض بعد الدورة بفترة قصيرة. عشان كده، لو مش ناوية على حمل، مهم تستخدمي وسائل تنظيم الأسرة المناسبة.

٦. خرافة: طبيعي يكون في آلام وقت الدورة

التقلصات والمغص و التعب حاجة عادية في بداية الدورة و بتقل تدريجيا بتحصل نتيجة انقباضات الرحم وتغير الهرمونات، لكن لو الألم شديد أو بيأثر على حياتك اليومية، فده مش طبيعي خالص و ممكن يكون بسبب حاجة عضوية. في أمراض زي بطانة الرحم المهاجرة أو الأورام الليفية ممكن تسبب ألم كبير وبتحتاج لاستشارة طبيب مختص.

٧. خرافة: الناس تقدر تعرف إنك في دورتك الشهرية

مفيش أي علامات واضحة بتبين إنك في دورتك. لا في ريحة مميزة ولا مشيتك بتتغير ولا لون بشرتك بيختلف. الأهم إنك تكوني مرتاحة مع نفسك ومش مضطرة تخبي. البنات دلوقتي بقت أكتر انفتاحًا بخصوص الموضوع ده، وده شيء صحي وطبيعي.