التغيرات المزاجية بعد الولادة
بقلم: مارينا عادل
ازاي تفرقي بين الاضطرابات الطبيعية والغير طبيعية وامتي تلجأي للطبيب
بتتقسم الاضطرابات المزاجية بعد الولادة الي حاجتين:
اول حاجة الكآبة النفاسية يعني الكآبة اللي بتحصل في فترة النفاس(baby blues)
ودي بتبقى اضطرابات طبيعية مفيش قلق منها
طيب تعرفيها ازاي؟
- بتبقي اضطرابات بسيطة ومؤقتة بتبدأ غالبا في اليوم الثاني او الثالث بعد الولادة
- أعراضها هي التقلبات المزاجية يعني كل شوية بمود مختلف و التوتر والعصبية وقلة النوم و البكاء بكثرة ولكنها مش بتأثر على اهتمام الأم بالطفل يعني بتقدري تأكليه وتهتمي بيه.
- الأعراض دي بتختفي تماما بعد مرور أسبوعين من ظهور الأعراض
والكآبه النفاسية دي تعتبر اضطرابات مقبولة ومفيش قلق منها ومش محتاجة اي علاج طبي لكن علاجها مجرد بس دعم من الأشخاص المحيطين بيكي وانك تتعودي على المسئولية الجديدة اللي هي الطفل.
والتغيرات دي بتحصل بعد الولادة بسبب حاجات كتير زي التغير السريع في تركيز الهرمونات وبسبب قلة النوم وعدم التأقلم مع مسؤوليات الامومة وعوامل اجتماعية كعدم وجود دعم للأم من أفراد الأسرة.
اكتئاب ما بعد الولادة (post partum depression) ودي اضطرابات غير طبيعية تحتاج التدخل الطبي
طيب تعرفيها ازاي؟
- يمكن انها تحصل في خلال السنة الأولى بعد الولادة ولكنها غالبا بتظهر في خلال ٤-١٢ اسبوع بعد الولادة.
- أعراضها هي فقدان الرغبة في الاهتمام بالنفس أو الطفل والتفكير في إيذاء النفس أو الطفل وده على عكس الكآبة النفاسية اللي بتقدري فيها تهتمي بنفسك وبطفلك وكمان من أعراضها فقدان الطاقة وتغير الشهية واضطرابات النوم والحزن المستمر.
- استمرار الأعراض لمدة أكثر من أسبوعين.
دي بتحتاج التدخل الطبي السريع لعلاجها لأنها تعتبر مرض وبتحتاج علاج.
طيب ايه هي الحاجات اللي تفرقلي بين الكآبة النفاسية و اكتئاب مابعد الولادة وايه هي العلامات التحذيرية اللي اول ماتحصل لازم اروح للطبيب؟
- التفكير في ايذاء النفس او الطفل (بمجرد ظهور الأفكار دي في دماغك لازم علي طول تروحي للطبيب بسرعة ومتستنيش اي وقت زيادة في الحالة دي ) بدون انتظار لمدة أسبوعين
- انك تحسي بالحزن المستمر و انك معندكيش القدرة او الرغبة بفعل اي شئ لنفسك او لطفلك والشعور بالامبالاه التامة وانك فقدتي اهتمامك بالحاجات اللي كنتي بتحبيها وبتبسطك وكمان لا مبالاه بكل اللي بيحصل حواليكي مهما كان
- التغير في الشهية لمدة اكثر من اسبوعين.
- لو اعراض الكآبة النفاسية البسيطة استمرت معاكي اكثر من اسبوعين او الأعراض كل شوية بتزيد بدل ما تتحسن.