العلاقة ما بين الغدة الدرقية والدورة الشهرية
كتير مننا ممكن يلاحظ تغيّرات في الدورة الشهرية: أوقات تيجي تقيلة، أوقات تغيب، وأوقات تبقى مش منتظمة. بس اللي مش كتير يعرفوه، إن الغدة الدرقية ممكن تكون سبب مهم ورا التغيّرات دي!
يعني إيه الغدة الدرقية وليه مهمة؟
الغدة الدرقية هي غدة صغيرة في الرقبة، بس ليها دور كبير! هي اللي بتفرز هرمونات بتتحكّم في عملية التمثيل الغذائي (الميتابوليزم)، وده بيأثر بشكل مباشر على الهرمونات التناسلية زي FSH وLH اللي بتنظّم الدورة الشهرية والتبويض.
تأثير قصور الغدة الدرقية (Hypothyroidism) على الدورة:
لما الغدة الدرقية تكون بطيئة أو مش شغالة بكفاءة، ده ممكن يسبب مشاكل في الدورة زي:
- الدورة تبقى تقيلة جدًا، وتطول، أو تيجي أكتر من مرة في الشهر.
- الدورة تكون مش منتظمة أو تفوت شهور.
- في حالات شديدة، ممكن الدورة تختفي تمامًا.
- ارتفاع في هرمون البرولاكتين، وده ممكن يمنع التبويض ويسبب مشاكل في الخصوبة.
مع أعراض جسدية زي تعب مستمر حتى بعد النوم، زيادة في الوزن، برودة في الأطراف، أو جفاف و تساقط شعر. كل ما الحالة كانت أشد، كل ما مشاكل الجسدية كانت أوضح وأصعب.
تأثير فرط نشاط الغدة الدرقية (Hyperthyroidism) على الدورة:
على العكس، لما الغدة تكون نشيطة أكتر من الطبيعي، الدورة:
- بتكون خفيفة جدًا أو قصيرة أو تيجي على فترات متباعدة.
- ممكن تبقى مش منتظمة أو تختفي خالص.
و هتلاحظي أعراض جسدية زي ضربات قلب سريعة أو غير منتظمة، توتر وعصبية زايدة، رعشة في اليدين أو تزول في وزن بالرغم ان شهيتك متغيرتش.
لو عندك اي تغيّرات مش مبررة في دورتك الشهرية او لو عندك تاريخ عائلي لاضطرابات الغدة الدرقية، مهم تروحي تتابعي مع طبيب مختص اللي هينصحك تعملي تحاليل TSH لمتابعة الوظائف.
الخبر الحلو؟ لو في مشكلة فعلاً، التشخيص والعلاج في الوقت المناسب يقدروا يحلوا اللخبطة، ويرجعوا الدورة تنتظم من تاني، من غير ما يأثروا على فرصك في الحمل أو الإنجاب