الدورة الشهرية و وسائل تنظيم الأسرة

وسائل تنظيم الأسرة كثيرة و بتسبب حيرة لينا في اختياراتها، لكن التنوع مرغوب فيه عشان يساعدك تلاقي الوسيلة المناسبة ليكي و لنمط حياتك.

وسائل تنظيم الأسرة بتنقسم لنوعين أساسيين: دائمة وغير دائمة. الوسائل غير الدائمة فبتشمل الهرمونية زي الحبوب، اللولب الهرموني، اللاصقات والشرائح، والحقن، ودي بتعتمد على تنظيم الهرمونات لمنع التبويض. أما الوسائل غير هرمونية زي اللولب النحاسي فا دي بتمنع الحمل بدون أي تأثير على الهرمونات. أما الوسائل الدائمة زي ربط الأنابيب عند السيدات أو قطع القناة المنوية عند الرجال، بتعتبر حل نهائي لمنع الحمل للأشخاص اللي مش ناويين يكون عندهم أطفال في المستقبل.

كل وسيلة منع حمل بتأثر بشكل مختلف على الدورة الشهرية، وده بيعتمد على نوع الوسيلة وطبيعة جسمك، مثلاً مدة الدورة ممكن تطول أو تقصر أو دم الحيض ممكن يزيد او يقل.

- حبوب منع الحمل

حبوب منع الحمل تعتبر من أكتر وسائل منع الحمل استخدامًا، وبتساعد كمان في تنظيم الدورة الشهرية. الحبوب دي بتحتوي على هرمونات صناعية زي الإستروجين والبروجستيرون، ودي بتمنع التبويض وبتقلل الألم والنزيف الزايد أثناء الدورة. فيه ستات كتير بيلاحظوا إن الدورة بتبقى منتظمة وأخف في الألم لما بياخدوا الحبوب بشكل منتظم. في نوعين من حبوب منع الحمل:

• حبوب منع الحمل المركبة: بيكون فيها الإستروجين والبروجستين وبتعمل دورة شهرية مصطنعة مش حقيقة عشان كده بتقلل النزيف. بمنع الحمل عن طريق: منع التبويض (ما فيش بويضة تنطلق). تغيير طبيعة بطانة الرحم عشان تمنع انغراس البويضة. زيادة لزوجة مخاط عنق الرحم، فبتصعب مرور الحيوانات المنوية.
• حبوب البروجستين فقط: أحيانًا معروفة باسم “حبوب الرضاعة”، لإنها مناسبة أكتر للسيدات المرضعات أو اللي ما يقدروا ياخدوا الإستروجين. بتشتغل بنفس الطريقة تقريبًا، لكن أهم نقطة إنها لازم تتاخد في نفس الوقت يوميًا لضمان الفعالية.

اللولب (IUD)

اللولب هو جهاز صغير بيتحط جوه الرحم عشان يمنع الحمل. فيه نوعين من اللولب: اللولب النحاسي واللولب الهرموني. اللولب الهرموني بيشتغل على تقليل كمية النزيف وبيخفف أعراض الدورة الشهرية المؤلمة. أما اللولب النحاسي فمابيبقاش فيه هرمونات، بس ممكن يسبب نزيف أكتر عند بعض الستات.

الحقن (Depo-Provera)

الحقن هي وسيلة طويلة المدى لمنع الحمل، وبتتاخد عن طريق حقن هرموني كل 3 شهور. الحقن دي ممكن تسبب انقطاع الدورة الشهرية عند بعض الستات، لكن الدورة بترجع تاني بمجرد ما مفعول الحقنة يروح.

زرع وسائل منع الحمل (Implants) وأشهرهم الإمبلانون

الزرع هو شريحة صغيرة بيتحط تحت الجلد، وبيفرز هرمونات لمنع الحمل. زي الحقن، الزرع ممكن يسبب انقطاع الدورة الشهرية عند بعض الستات أو يقلل النزيف والألم.

لو بتعاني من مشاكل في الدورة الشهرية زي الألم الشديد أو النزيف الزايد، ممكن تكون وسائل منع الحمل الهرمونية زي الحبوب أو اللولب الهرموني هي الاختيار الأنسب ليكي. لكن لو بتفضلي وسيلة طبيعية أكتر أو مش حابة تاخدي هرمونات، الواقيات أو اللولب النحاسي ممكن يكونوا خيارات المتاحة.

فهم العلاقة بين الدورة الشهرية ووسائل منع الحمل يمكن أن يساعدك في اتخاذ قرار مستنير يناسب صحتك واحتياجاتك. اخيتار الوسيلة بيكون من خلال النقاش مع الدكتور في الوسائل المختلفة وشرح تفضيلاتنا والرغبة في تأجيل الحمل لمدة قد إيه وغيرها من العوامل عشان تختاري أنسب وسيلة ليكي.