ايه هي البريود؟

تعتبر البريود أحد العمليات الطبيعية اللي بتحصل في الجسم، كواحدة من علامات البلوغ عند البنات، واللي بتستمر بعد كده لحد ما تنقطع عند سن 45-55 سنة ودي اللي بنسميها الفترة الإنجابية.

البريود فترة منتظمة بتتكرر بمعدل كل شهر تقريبًا، مع اعتبار إن في فروق بين البنات، فغالبًا المدة الزمنية لتكرار حدوث البريود بتكون بين 23 لـ 35 يوم، وبتستمر البريود نفسها من 3 لـ 7 أيام.

على مدار الشهر، الجسم بيفرز هرمونات بتساعد على نمو بطانة الرحم عشان يكون مستعد في حالة إن حصل إنه يشيل البيبي، واللي بيحصل وقت البريود لأن مافيش حمل حصل، فالجسم بيبدأ يتخلص من البطانة دي عن طريق دم الحيض.

وقت البريود وأحيانًا كمان في الفترة اللي قبلها بكام يوم، بيكون في بعض التقلبات المزاجية أو إرهاق ووجع في الجسم، وكمان وجع في الضهر والبطن، وبعض البنات بيكون عندهم تغير في شهيتهم للأكل، وبتزيد الرغبة في أكل الدهون أو الحلويات.

التعامل مع البريود ممكن يكون شيء جديد وغريب في الأول، بس مهم نهتم بالنظافة الشخصية واستخدام منتجات مناسبة عشان ما تسببش حساسية، ومهم كمان الأكل الصحي في الفترة دي، ويفضل ممارسة أي رياضية بسيطة زي المشي او أي تمارين بسيطة في البيت.