اعراض وقت البريود ما ينفعش نتجاهلها

وقت البريود في بعض الحاجات اللى ممكن تكون مش طبيعية عليكى وفى الحالة دي يفضل استشارة الدكتورعشان تتأكدي ان كل حاجة تمام وان مافيش مشكلة محتاجة تدخل زي مثلا:

• نزيف شديد وفقدان دم كتير بيخليكى محتاجة تغيرى الفوط الصحية كل ساعة او ساعتين على غير الطبيعي بتاعك ومخليكى بتحسى بدوخة او تعب.
• الام حادة غير محتملة ومأثرة على سير حياتك بشكل طبيعي ومحتاجة مسكنات قوية.
• اعراض غير عادية زي حكة شديدة او ريحة مش طبيعية او وجود تكتلات او تجلطات في الدم.
• البريود مش منتظمة يعنى ممكن تفضل 3 شهور او اكتر مش بتيجى.
• زيادة مدة النزيف كمان خصوصا لو اكتر من 8 أيام بالذات لو العادي بتاعك ان البريود مش بتفضل مدة طويلة ده ممكن يكون حاجة محتاجة نخلي بالنا منها.
• أي اختلاف عموما عن الطبيعي بتاعك زي مثلا ان يكون في وجع في أوقات مختلفة او نزيف بين البريود واللي بعدها او حتى عدم انتظام في المواعيد بعد ما كانت البريود بتحصل بشكل منتظم.

أي حاجة من الحاجات اللي فوق مش شرط تكون مشكلة طبية ،بس الأفضل إنك تاخدى رأى طبيب متخصص عشان لو في مشكلة يكون التدخل في حلها من بدرى ويكون العلاج اسهل.