فيروس الورم الحليمي البشري وسرطان عنق الرحم: كل اللي محتاجة تعرفيه
فيروس الورم الحليمي البشري , هو فيروس بينتقل جنسيا يعني عن طريق التقاء مباشر بين الأعضاء التناسلية لشخصين لو فيهم حد مصاب و الفيرس ده برضه بينتقل عن طريق تلامس الفم لأي مكان مصاب.
في أنواع من فيروس HPV بتكون غير خطيرة وبتروح لوحدها بتسبب ثآليل في المناطق التناسلية، بس في شوية أنواع معينة اسمهم “الأنواع عالية الخطورة”، دول ممكن يسببوا تغييرات غير طبيعية في خلايا عنق الرحم، ولو التغييرات دي ما اتلحقتش بدري، ممكن تتطوّر مع الوقت وتتحوّل لسرطان عنق الرحم.
النوعين الأكثر شيوعًا اللي بيرتبطوا بسرطان عنق الرحم هما HPV 16 وHPV 18، وبيسببوا حوالي 70% من الحالات على مستوى العالم.
اللي بيخلّي الموضوع صعب شوية إن الفيروس غالبًا ما بيعملش أي أعراض، وده معناه إن السيدة ممكن تكون مصابة من غير ما تعرف. لكن مع تطوّر الحالة ممكن تظهر:
- ثآليل تناسلية (نموات صغيرة شبه القرنبيط)
- نزيف بين الدورة والدورة أو بعد العلاقة
- إفرازات ريحتها مش طبيعية
- ألم في الحوض أو أثناء العلاقة
- تعب عام وفقدان وزن غير مبرر (في الحالات المتقدمة)
لو ظهر أي من الأعراض دي، مهم جدًا تروحي للدكتور بسرعة.
سرطان عنق الرحم بييجي في الغالب بسبب عدوى مستمرة بأنواع من فيروس HPV اللي بتكون عالية الخطورة (سبب أساسي للإصابة بالسرطان ده). ورغم إنه تاني أكتر سرطان بيصيب الستات على مستوى العالم، إلا إن سرطان عنق الرحم ممكن جدًا نتجنبه ونعالجه لو اكتشف بدري بنسبة الشفاء بتوصل لـ ٩٠% من الطرق كتير للوقاية من الإصابة بسرطان عنق الرحم:
- التطعيم ضد HPV: التطعيم ده آمن وفعّال جدًا، وبيحمي من أكثر الأنواع اللي بتسبب السرطان. بيتاخد في سن صغير (من ٩- ١٤ سنة)، لكن كمان ممكن يتاخد لحد سن ٢٦ وأحيانًا لحد ٤٥ حسب الحالة. للأسف التطعيم مش متوفر ببلاش في مصر و بيفضل انه يتاخد قبل سن ١٥ سنة لضمان الوصول لأعلى نسبة حماية وبيكون جرعتين بينهم ٦-١٢ شهر و ثلاث جرعات في سن الأكبر.
- الكشف الدوري السنوي: زي مسحة عنق الرحم (Pap smear) أو اختبار كل ٥ سنين HPV. دول بيقدروا يكتشفوا أي تغييرات بدري جدًا قبل ما تتحوّل لحاجة خطيرة.