الدم بيقولك ايه؟ فهم الكميات و الاحتياطات

دم الحيض ممكن يعرفنا تفاصيل كتير عن حالتك الصحية، طبيعة جسمك و حالة الجهاز التناسلي، يقدر يعرفنا قد إيه الدورة منتظمة أو مش منتظمة، و كمان يبين لنا إذا كان فيه أي مشاكل صحية زي الاضطرابات الهرمونية أو مشاكل في الرحم أو المبايض.

عشان كده مهم نفهم ايه هي الخصائص الطبيعية لدم الحيض ؟

معدل الطمث الطبيعي يختلف من واحدة للتانية، لكن في الغالب بيبقى من من ٣ لـ ٧ أيام و بتتأثر بشكل كبير بموانع الحمل زي لأقراص و اللولب اللي ممكن تخلي الدورة ماتجيش او تقلل من كمية دم الحيض.

• لون دم الحيض لون دم الحيض بيختلف على حسب وقت نزوله في مرحلة الحيض، أول ايام في الدورة الدم بيكون احمر ، يبدأ يغمق للون احمر غامق او بني في أخر أيام. لو لاحظتي لون الدم أحمر الوردي ممكن يكون بسبب نقص الإستروجين.

• كمية دم الحيض الكمية اللي بتفقديها خلال فترة الدورة كلها عادة بتكون حوالي ٦٠ مل، يعني تقريبًا قد ٦ معالق كبار. بالمعدل ده، المفروض تغيّري الفوطة الصحية كل ٤-٦ ساعات لو الكمية زادت بشكل ملحوظ لدرجة إنك مضطرة تغيّري الفوطة كل ساعة أو ساعتين، ده ممكن يكون دليل على وجود مشاكل زي الأورام الليفية في الرحم أو اضطرابات هرمونية و ممكن يسبب نقص في الحديد أو فقر الدم (انيميا). أول يومين في الدورة الشهرية بيكونوا أكتر غزارة لأن الرحم بيتخلص من بطانته بشكل مكثف في البداية. بعد كده، كمية الدم بتبدأ تقل تدريجيًا لحد ما توصل لمرحلة التنقيط في آخر أيام الدورة. في بعض الاوقات لو انتي مش علي اي موانع حمل ممكن تكون الكمية قليلة جدا في بداية الدورة و ده لو معاه اعراض تانية بننصحك تستشيري دكتور لاستعباد اي سبب طبي.

• قوام دم الحيض الطبيعي أن الدم بيكون زي سائل مع بعض التجمعات/الكتل الصغيرة، بس لو كان فيه تجلطات كبيرة (حجمها أكبر من حجم الجنيه)،ده ممكن يكون دليل على وجود مشاكل في تجلط الدم أو وجود أورام ليفية في الرحم.

• رائحة دم الحيض الطبيعي أن دم الحيض ليه ريحة خفيفة لكن لو لاحظتي رائحة قوية وكريهة، ممكن يكون دليل على عدوى.

متابعة الدم وتغيراته مش بس بتساعدك تفهمي جسمك أكتر، لكنها كمان ممكن تكون أداة لاكتشاف أي مشكلة صحية مبكرًا.