اكل ايه بعد الدورة؟
بعد الحيض، جسمك بيدخل مرحلة جديدة من الدورة الشهرية: اسمها المرحلة التجهيز. في الوقت ده، الجسم بيكون في وضع “بناء” وبيبدأ يجهز نفسه التبويض، والهرمونات بتبدأ تتغيّر تدريجيًا و مستويات الاستروجين بتزيد، وده وقت مثالي لدعم جسمك من خلال التغذية السليمة اللي تدعم الهرمونات.
طيب هناكل إيه في المرحلة دي؟
- البروتينات:
البروتين بيساعد في إصلاح الأنسجة ودعم إنتاج الهرمونات. حاولي تزودي مصادر متنوعة للبروتين في وجباتك زي:
- البيض
- الزبادي الطبيعي أو اليوناني
- الجبنة القريش
- الفراخ، اللحمة أو السمك
- البقوليات:
زي العدس، الحمص، الفاصوليا الحمراء أو البيضاء – سواء في السلطات، الشوربات، أو حتى أطباق رئيسية
- الحديد والمغذيات الداعمة للطاقة
أثناء الحيض، الجسم بيفقد شوية حديد، في مرحلة ما بعد الدورة محتاجة تعويض. ركزي على أطعمة غنية بالحديد زي السبانخ، الكبدة، البنجر، والعدس و كلي كُلي معاه حاجة فيها فيتامين C زي عصير ليمون أو برتقال، علشان جسمك يمتص الحديد بشكل أفضل.
- الدهون الصحية :
الدهون مش دايمًا حاجة سلبية! الدهون الصحية مهمة جدًا علشان توازن الهرمونات وتحافظ على صحة التبويض. تلاقيها في الأفوكادو، و الزيتون وزيته و المكسرات النيّة (زي عين الجمل، اللوز، الكاجو).
- الفواكه والخضار:
كل واحد فينا محتاج ياكل على الأقل ٥ حصص من الفاكهة والخضار المتنوّعين كل يوم. زودي من التوت، الفراولة، الكيوي: الغنية بمضادات الأكسدة، لأنها بتقلل الالتهابات وبتحافظ على نشاط الجسم البروكلي، الكرنب فيهم مادة طبيعية اسمها دي-إندوليل ميثان(DIM)، واللي بتساعد جسمك على تنظيم هرمون الإستروجين
- الفايتوإستروجينات (Phytoestrogens):
دي مركبات نباتية بتتشابه في تأثيرها مع هرمون الإستروجين في الجسم. موجودة في أكلات زي بذور الكتان ومنتجات الصويا، البلح، القراصيا (البرقوق المجفف)، والمشمش المجفف وبتساعد في تنظيم مستويات الإستروجين بشكل طبيعي.
- الفيتامينات ومعادن
مهمة جدًا لجِسمك علشان يقدر ينتج هرمون الإستروجين بشكل طبيعي ويستخدمه بكفاءة، وده بيفرق في توازن الهرمونات خاصة وقت الدورة أو في فترات التغيرات الهرمونية ممكن تركزي على:
- البورون (Boron): معدن بيساعد الجسم على امتصاص واستخدام هرمونات زي الإستروجين والتستوستيرون
- فيتامين B (خصوصًا B6 وB12): بيساعد الجسم على إنتاج وتنظيم الإستروجين، وكمان بيدعم صحة الأعصاب والمزاج.
- فيتامين D: بيشتغل زي الهرمون في الجسم، وضروري لإنتاج الإستروجين وكمان بيدعم صحة العظام.