الرئيسية
تأخر الحمل: إمتى نقول في مشكلة؟
بقلم: مارينا عادل
اتجوزتي من قريب وقلقانة لأن الحمل اتأخر شوية؟ ومش عارفة تستني لحد امتى قبل ما تروحي للدكتور؟ يبقى المقال ده ليكي.
تأخر الإنجاب، بتسمعي كتير المصطلح ده وبتقلقي منه. طيب هو يعني إيه تأخر الإنجاب؟ هل معناه التأخر في الحمل شهر مثلًا، ولا شهرين، ولا تلاتة، ولا كام بالظبط؟ وهل ينفع تروحي لوحدك للدكتور للكشف عن تأخر الإنجاب من غير جوزك؟ كل الأسئلة دي بتدور في دماغك وبتعملك قلق في الفترة اللي إنتي مستنية فيها يحصل حمل.
إحساس القلق ده حاجة منتشرة ومفهومة في الفترة ديه. عشان كده في المقال ده هنوضحلك الأسباب وراء تأخر الإنجاب، ونصحح شوية مفاهيم غلط منتشرة عنه.
إيه هو التعريف الصحيح لتأخر الإنجاب؟
التعريف الطبي الصحيح لتأخر الإنجاب هو عدم القدرة على حدوث حمل بعد سنة كاملة (يعني مش شهر ولا شهرين ولا ستة)، بالشروط الآتية:
- حدوث علاقة زوجية منتظمة طول فترة السنة دي. لو جوزك مسافر وبييجي مرة واحدة في السنة مثلًا، والعلاقة الزوجية مش منتظمة، مش هينفع نقول عليها تأخر إنجاب، لأن أصلًا مفيش انتظام في العلاقة الزوجية، ولازم يحصل انتظام فيها الأول قبل ما ندور على أي أسباب طبية.
- عدم استخدام أي وسائل حماية أثناء العلاقة الزوجية (زي الواقي)، لأن ده هيمنع حدوث الحمل أصلًا.
- عدم استخدام أي وسائل لمنع الحمل.
إمتى تبدأي تفكري تروحي للدكتور؟
- لو كملتي سنة كاملة بدون حدوث حمل، بشرط إنك محققة الشروط اللي فاتت (العلاقة المنتظمة، وعدم استخدام وسائل حماية أو منع حمل).
- لو سنك أكبر من ٣٥ سنة، ساعتها مش لازم تستني سنة كاملة، ويفضل تروحي بدري شوية بعد ما تكملي ٦ شهور.
إيه هي أسباب تأخر الإنجاب؟
- أسباب تخص المرأة: بتمثل حوالي ٤٠٪ من الأسباب، وهنتكلم عنها بالتفصيل تحت.
- أسباب تخص الرجل: بتمثل حوالي ٣٠٪ من الأسباب، وأهم تحليل لازم نعمله هنا هو تحليل السائل المنوي عشان نعرف لو في مشكلة أو لا.
- أسباب تخص الرجل والمرأة الاتنين معًا: بتمثل حوالي ٢٠٪ من الأسباب.
- أسباب غير مفسرة (كل الفحوصات بتكون سليمة): بتمثل حوالي ١٠-١٥٪ من الأسباب.
إيه الأسباب اللي تخص المرأة وبتسبب تأخر الإنجاب؟
- اضطرابات التبويض: زي تكيّس المبايض، أو زيادة هرمون الحليب، أو الضغط والتوتر، أو مشاكل الغدة الدرقية، أو قصور المبيض المبكر. وده بيمثل حوالي ٤٠٪ من الأسباب عند النساء.
- مشاكل في قنوات فالوب (القنوات اللي بتنقل البويضة من المبيض للرحم): زي حدوث انسداد فيها. وده بيمثل حوالي ٣٠٪ من الأسباب عند النساء.
- بطانة الرحم المهاجرة: ممكن تأثر على عملية التبويض أو على القنوات. وده بيمثل حوالي ١٥٪ من الأسباب عند النساء.
- مشاكل تخص الرحم أو عنق الرحم: زي الأورام الليفية أو العيوب الخلقية. وده بيمثل حوالي ١٠٪ من الأسباب عند النساء.
- أسباب غير مفسرة: بتمثل حوالي ١٠٪ من الأسباب.
- عامل السن: كل ما السن يزيد عن ٣٥ سنة، نسبة حدوث الحمل بتقل، وده بسبب قلة عدد البويضات وكفاءة المبيض مع الوقت.