الأورام الليفية
أوقات كتير بنفتكر إن الدورة الغزيرة أو الألم الشديد حاجة “عادية” أو “محتملة”، بس الحقيقة إن جسمك ممكن يكون بيقولك حاجة مهمة. واحدة من الأسباب اللي ممكن تكون ورا اللخبطة دي هي الأورام الليفية.
إيه هي الأورام الليفية؟
رغم إن اسمها “أورام”، الأورام الليفية مش حاجة تخوّف. هي أورام حميدة بتظهر في الرحم، غير سرطانية و مبتزودش نسب حدوث سرطان، وشائعة جدًا بين الستات. وكتير منهم ممكن يعيشوا بيها من غير ما يحسوا بأي حاجة.
الأورام الليفية شائعة جدًا، ووجودها مش معناه دايمًا إن في خطر, حوالي ٧٠% من النساء ممكن يكون عندهم أورام ليفية في مرحلة ما من حياتهم، خصوصًا بين سن ٣٠ و٥٠ سنة.لكن مش كلهم بيظهر عليهم أعراض.
في حالات كتير، الأورام الليفية بتسبب:
- غزارة في الدورة الشهرية – ممكن تنزلي دم كتير لدرجة تأثر على نشاطك أو تسبب لك أنيميا
- مدة الدورة تطول عن الطبيعي – بدل ٤ أو ٥ أيام، ممكن تلاقيها بتستمر أسبوع أو أكتر
- ألم شديد في البطن أو الظهر – وخصوصًا أثناء أو قبل الدورة
- إحساس بانتفاخ أو ضغط أسفل البطن – كأن في حاجة بتزق على المثانة أو الرحم من جوه
- أعراض في المثانة – زي التبول المتكرر أو صعوبة في تفريغ المثانة بالكامل
- مشاكل في الجهاز الهضمي – زي الإمساك أو صعوبة في التبرز مع مجهود
- صعوبة في الحمل – الأورام الليفية بتأثر على قدرة الرحم على استقبال البويضة المخصبة
- مضاعفات أثناء الحمل – زي الولادة المبكرة أو وضع غير طبيعي للجنين او المشيمة، وفي بعض الحالات، الأورام الليفية ممكن تزود احتمالية الولادة القيصرية
- ألم أثناء العلاقة الحميمة – خصوصًا لو الورم قريب من عنق الرحم أو بيضغط على الأنسجة المحيطة
لو لاحظتي اي من الاعراض ديه، بننصحك تستشيري طبيب نسا، عشان يتم الفحص والتشخيص السليم.
هل في سبب وراء ظهور الأورام الليفية؟
السبب الحقيقي لظهور الأورام الليفية مش معروف بشكل قاطع .لكن الدراسات بتقول إن كل ورم ليفي ممكن يبدأ من خلية عضلية واحدة في الرحم، الخلية دي بتتغيّر بشكل غير طبيعي، وتبدأ تنقسم بسرعة. اللي بيساعدها تكبر؟ هو هرمون الإستروجين, عشان كده ده، دي حاجة خارجة تمامًا عن إرادتك, ومش حاجة ممكن تتجنبيها بتغيير نمط الحياة.
هل في علاج؟
علاج الأورام الليفية بيعتمد على حجمها، مكانها (نوعها)، الأعراض اللي بتسببها ورغبتك في الحمل. ممكن يكون مراقبة بس لو مفيش أعراض او أدوية لتنظيم الهرمونات وتقليل النزيف او عمليات جراحية بسيطة أو استئصال لو كانت مسببة مشاكل شديدة.