الأنيميا و البريود: هل غزارة الدم ممكن تأثر على صحتك؟

غزارة دم الحيض ومدته في الدورة شهرية بتختلف من شخص لشخص ومن دورة للتانية،في بعض الحالات الكمية ممكن تكون اكتر و الحيض يستمر لمدة أطول من الطبيعي فتأثر على الحياة اليومية. الحالة دي معروفة بإسم ‘غزارة الطمث’ اللي ممكن تتسبب في نقص الحديد و ده مهم لتكوين خلايا الدم الحمراء وبالتالي يسبب انيميا.

رغم إنه ساعات بتحسي إن كمية الدم كتيرة، لكن الكمية الطبيعية اللي بتفقديها خلال فترة الدورة كلها عادة بتكون حوالي ٦٠ مل، يعني تقريبًا قد ٦ معالق كبار. بالمعدل ده، المفروض تغيّري الفوطة الصحية كل ٤-٦ ساعات و في الاغلب اول يومين في الدورة بيكونوا اكثر غزارة.

لو كنتي بتعاني من غزارة الطمث، فيه علامات وأعراض لازم تبقى حريصة على متابعتها عشان تعرفي إذا كنتِ مصابة بالأنيميا أو لا زي:

• فقدان أكثر من ٨٠ مل (يعني حوالي ٨ معالق) من الدم في دورة واحدة وتكرار دا بشكل منتظم في الدورات اللي بعدها، بمعنى انك تضطري تغيري الفوطة كل ساعة أو ساعتين بسبب النزيف الشديد
• الشعور بالتعب والضعف العام، خصوصًا أثناء الدورة
• تكتلات كبيرة (بحجم الجنيه) في دم الدورة
• شحوب الجلد، أو ملاحظة أن لون بشرتك بيبقى أفتح من المعتاد
• دوخة أو شعور بالإغماء، خاصة مع الحركة أو المجهود
• صعوبة في التنفس، أو الشعور بزيادة ضربات القلب
• برودة الاطراف، زي اليدين والقدمين

لو لاحظتي الأعراض دي، مهم استشارة الدكتور لإجراء الفحوصات اللازمة. عادةً، الدكتور ممكن ينصحك بمكملات الحديد أو تعديل النظام الغذائي لزيادة مستويات الحديد في الجسم، اللحوم الحمراء، الدواجن، الأسماك، والبقوليات فيهم نسبة حديد عالية، ولازم تزودي الاكلات الغنية بفيتامين C اللي بتساعد على امتصاص الحديد زي البرتقال و الجوافة.

كمان ممكن يطلب منك فحوصات عشان يعرف سبب غزارة الطمث اللي ممكن تكون بسبب تغيرات هرمونية، زي ما بيحصل أحيانًا بسبب وسائل منع الحمل، أو مشاكل صحية تانية