يعنى ايه تبويض؟

كل بنت بتتولد بمئات الآلاف من البويضات الصغيرة جدًا، لكن مش كلها بتخرج مرة واحدة! كل شهر، جسمك بيختار بويضة واحدة تنضج وتتحرر من المبيض، واللحظة دي هي اللي بنسميها التبويض.

التبويض جزء طبيعي من الدورة الشهرية, في المرحلة دي، بيتم إطلاق البويضة الناضجة من المبيض، ولو قابلت حيوان منوي بيحصل تخصيب اللي بينتج منه حمل. ولو ماحصلش تخصيب، البويضة بتنزل مع الدورة الشهرية. التبويض بيحصل مرة واحدة كل شهر، و ممكن نعرف وقت التبويض عن طريق إننا نشوف الدورة الشهرية بتحصل كل أد إيه ونطرح من الإطار الزمني ده ١٤ يوم. (مثال: لو الدورة بتحصل كل ٢٨ يوم فده يخلينا نتوقع إن التبويض غالبا هيحصل يوم ١٤) بس دا لو دورتنا منتظمة.

إيه اللي ممكن يأثر على التبويض؟ التبويض بيحصل لما الجسم يكون في حالة صحية متوازنة، لكن فيه حاجات ممكن تلخبطه، زي:

• التوتر: القلق والزعل الكتير ممكن يخلي التبويض يتأخر.
• الأكل: لو بتاكلي أكل غير صحي أو عندك نحافة شديدة أو سمنة، ممكن التبويض يتلخبط.
• الهرمونات: مشاكل صحية زي تكيس المبايض أو اضطرابات الغدة ممكن تأثر على التبويض.
• العمر: كل ما بتقدم في العمر، عدد البويضات بيقل .