السكر فى الحمل

السكر وقت الحمل من أكثر الحالات الشائعة اللي ممكن تظهر خلال فترة الحمل، ومش شرط تكوني عندك سكر قبل كده. المتابعة والفهم الصح للحالة بيساعدوا إن الحمل يعدّي بأمان، وإنتِ والبيبي تكونوا بصحة كويسة.

إيه هو سكر الحمل؟

سكر الحمل هو ارتفاع في مستوى السكر في الدم وقت الحمل، وغالبًا بيحصل في التلت التاني أو التالت. و ده لإن هرمونات الحمل بتخلّي الجسم يستجيب أقل للأنسولين، فالسّكر يعلى في الدم. مهم نعرف إن:

ممكن يجيلك سكر حمل حتى لو عمرك ما كان عندك سكر
معظم الحالات بتتحسّن بعد الولادة

مين أكتر عرضة لسكر الحمل؟

ممكن يحصل لأي حامل، لكن الفرصة بتزيد لو:

في تاريخ عائلي لمرض السكري
فى زيادة وزن قبل الحمل
عندك تكيسات المبايض
الحمل في سن كبير فرق ال٣٥
جالك سكر حمل قبل كده

أعراض سكر الحمل

في حالات كتير، سكر الحمل ملوش أعراض واضحة، وعلشان كده لو بتحسي بالاعراض ديه لازم تعرفي دكتورك:

عطش شديد
دخول الحمام كتير
تعب غير معتاد
زغللة في العين

إزاي بيتشخّص سكر الحمل؟

التشخيص بيتم عن طريق تحليل تحمل السكر، وغالبًا بيتعمل ما بين الأسبوع ٢٤ لـ ٢٨ من الحمل. ولو النتيجة مش طبيعية، الدكتور هيطلب تحاليل إضافية للتأكيد زى سكر دم فاطر و صايم.

هو سكر الحمل خطر؟

لو ما اتتابعش، ممكن يسبب:

زيادة وزن البيبي عن الطبيعي
زيادة في المياه اللي حولين البيبي
صعوبة أثناء الولادة
ولادة مبكرة
انخفاض مستويات سكر البيبي بعد الولادة و كمان الأطفال المولودين لأمهات عندهم سكر في الحمل ممكن يكونوا أكثر عرضة لبعض المشاكل بعد الولادة، زي:
صعوبة في التنفس بسبب إن الرئة ممكن تكون أقل نضجًا.
زيادة في كرات الدم الحمراء.
ارتفاع نسبة الصفراء.
زيادة سُمك عضلة القلب.

لكن الخبر الكويس إن لو انتي ملتزمة بالعلاج والمتابعة، معظم الحوامل بيكملوا حملهم عادى من غير اى مشاكل. عشان تتحكمي بالسكر مهم انك تعتمدي علي:

تغذية صحية: وجبات متوازنة مفيهاش سكريات، مع تقسيم الأكل على وجبات صغيرة ومتكررة و نزود الخضار والبروتين والنشويات الكاملة.
الحركة: المشي أو تمارين خفيفة للحامل بعد استشارة الدكتور، لأنها تساعد الجسم يستخدم الإنسولين بشكل أفضل. متابعة السكر: قياس السكر بانتظام وتسجيل القراءات لمتابعتها.
العلاج: في الحالات بتحتاج لإنسولين أو أودية تانية زي الميتفورمين، اللي بيكون آمن في الحمل تحت إشراف طبي.

بعد الولادة

في أغلب الحالات مستوى السكر بيرجع طبيعي بعد الولادة، لكن بيكون في احتمال أعلى بالإصابة بالسكر من النوع التاني بعد كده. علشان كده مهم:

تعملي تحليل سكر بعد الولادة
تحافظي على نمط حياة صحي