الثلث الثاني من الحمل: مرحلة شهر العسل
بعد ما عدّيتي أول ٣ شهور واللي بيكونوا صعبين على أغلب الأمهات، الثلث التاني من الحمل غالبًا بيبقى أهدى وأخف على جسمك ونفسيتك. كتير من الستات بيحسّوا براحة واضحة في الفترة دي، لأن جسمك بدأ يتأقلم على التغيرات الكبيرة اللي حصلت في أول شهور الحمل.
الثلث التاني بيبدأ من الشهر الرابع لحد الشهر السادس، وعلشان كده أمهات كتير بيسموه شهر العسل في الحمل. أعراض الثلث الأول زي الغثيان والتعب الشديد بتقل، وبنبدأ نشوف جوانب ألطف من الرحلة: بشرتك وشعرك ممكن يبانوا أنضر وأصح، بطنك تبدأ تكبر وتظهر أكتر، ومعاها تيجي واحدة من أجمل لحظات الحمل… أول إحساس بحركة البيبي.
إيه اللي بيحصل لجسمك في الثلث التاني؟
- البطن بتبدأ تظهر أكتر مع نمو البيبي، حجم البطن بيكبر تدريجيًا، وده بيخلي الحمل باين وواضح.
- حركة البيبي أول حركة غالبًا بتكون إحساس خفيف زي رفرفة، ومع الوقت الحركة بتبقى أوضح وأقوى، وبتبدأي تتفاعلي معاها وتستنيها.
- تغيرات طبيعية في الجسم زيادة وزن بسيطة، تورم خفيف في الإيدين أو الرجلين، وأحيانًا وجع في الظهر أو الحوض، وده كله طبيعي نتيجة توسّع الرحم وتغيّر مركز الجسم.
- هرمونات الحمل بتستقر شوية وده سبب إن الغثيان يقل، والمزاج يبقى أهدى مقارنة بالثلث الأول.
نمو البيبي في الثلث التاني
في المرحلة دي، البيبي بينمو بسرعة ملحوظة: الأطراف بتطول، العظام بتقوى، والعضلات بتتكوّن بشكل أوضح. الحواس كمان بتبدأ تكتمل تدريجيًا، والبيبي ممكن يفتح عينه ويتحرك أكتر. لسه كل احتياجاته الغذائية بتيجي من المشيمة، وعلشان كده تغذيتك السليمة في الفترة دي مهمة جدًا لنمو صحي وآمن للبيبي.
المتابعة الطبية في التلت التاني
خلال زيارات المتابعة، الدكتور هيطمن على:
- ضغط الدم
- الوزن
- تحليل البول
- متابعة البيبي بالسونار، وغالبًا بيشمل سونار تفصيلي (حوالي الأسبوع ١٨–٢٢) علشان نطمن على نمو الأعضاء، وزن البيبي، ومكان المشيمة، والكشف عن أي عيوب خلقية.
كمان الدكتور هيتكلم معاكي عن تحاليل الدم المطلوبة، وده غالبًا بيشمل تحاليل لمتابعة السكر في الدم، زي اختبار تحمل السكر و السكر التراكمى، علشان نطمن إن مفيش سكر حمل.
نصايح عملية للثلث التاني
- حاولي تحافظي على وجبات متوازنة، مليانة بالبروتين والخضار والفواكه.
- اشربي مياه كتير علشان تقللي التورم وتحمي نفسك من الجفاف.
- كملي حمض الفوليك والكالسيوم حسب تعليمات دكتورك، وممكن يضيف فيتامين د أو الحديد لو جسمك محتاج.
- اعملي تمارين كيجل بانتظام عشان تقوي عضلات الحوض ، لأنها بتساعد وقت الولادة وتقلل فرص التمزقات و قص العجان.
- تابعي وزنك مع دكتورك بانتظام، لأنه مؤشر مهم لصحتك وصحة البيبي.
- لو حملك في موسم البرد، خدي تطعيم الإنفلونزا لحمايتك وحماية البيبي.
- حاولي تنامي على جنبك، لأن النوم على الظهر مع كبر حجم الرحم ممكن يضغط على الأوردة فيأثر على تدفق الدم.
- استمتعي بحركة البيبي، وسجّلي أول إحساس بيه… لحظة بسيطة بس بتفضل في الذاكرة طول العمر