الفوط اليومية - المختصر المفيد

كتير مننا بيلجأ للفوط اليومية (بانتي لاينر) كحل عملى وسريع للحفاظ على نظافتنا الشخصية وراحتنا طول اليوم، خصوصًا في فترة التبويض أو في وجود إفرازات خفيفة. الفوط دي بتساعد على امتصاص الإفرازات أو التنقيط اللي بيحصل في آخر الدورة الشهرية، وكمان بتساعد في تجنب الروائح المزعجة وامتصاص العرق، وبالتالي بتحافظ على جفاف البشرة.

منطقة الفرج بتكون معرضة للرطوبة بسبب الإفرازات أو العرق، وده بيشجع نمو البكتيريا والفطريات اللي ممكن تسبب عدوى. عشان كده، مهم نحافظ على جفاف المنطقة دي، و نمنع تراكم الرطوبة.

بالرغم من فوائدها لكن سوء الاستخدام ممكن يعملك مشاكل صحية زي التهيج الجلدي، التهابات المهبل، أو زيادة خطر الإصابة بالبكتيريا والفطريات، عشان كده مهم جدا نعرف ازاي نستخدمها صح.

• ماتلبسيش نفس الفوطة لفترة طويلة: على الرغم من أن الفوط اليومية مصممة للاستخدام الخفيف، مهم تغييرها كل 4 ساعات حتى لو مش مبلولة عشان تتجنبي نمو البكتيريا.
• لازم تغيري الفوطة اليومية فورًا لو اتبلت: الرطوبة بتزود من التهابات المهبل، وممكن تزود الإفرازات.
• تجنبي استخدام الفوط المعطرة: لأنها ممكن تأثر على توازن الحموضة في المهبل وتسبب تهيج للبشرة. في بدالها فوط بتمتص الروائح هتديكى نفس المفعول.
• اختاري فوط مصنوعة من مواد قابلة للتنفس زي القطن: بتسمح للهواء يعدي فتحافظ على جفاف المنطقة وتمنع الروائح المزعجة.