كيس الشوكولاتة على المبيض
بقلم: أغابي أمير
كيس الشوكولاتة على المبيض.. إيه هو وإزاي تتعاملي معاه؟
لو بحثتي قبل كده عن كيس الشوكولاتة أو سمعتي عنه من دكتور ومفهمتيش يعني إيه، يبقى كمّلي معانا المقال للآخر.
إيه هو كيس الشكولاتة؟
في الأول خلّينا نفهم إن الرحم من جواه فيه بطانة بتتجدد كل شهر، ومع أيام الحيض بتبدأ البطانة تنزل من الرحم وترجع تتبني تاني خلال الشهر، وتتكرر الدورة مرة كل شهر.
بطانة الرحم مكانها الطبيعي جوه الرحم بس، ومش بنلاقيها براه. لكن أحيانًا ممكن نلاقي أنسجة شبيهة ببطانة الرحم موجودة في أماكن تانية جوه الجسم، وساعتها بيبقى اسمها بطانة الرحم المهاجرة، واللي بتاخد نفس شكل الدورة الشهرية؛ تتخن، ولما ييجي وقت الحيض متلاقيش مخرج.
الخلايا دي ممكن تتكوّن على المبايض وتسبب أكياس الشوكولاتة، وده لأن بيكون جواها دم قديم لونه بني.
إيه هي الأعراض اللي ممكن تحسي بيها؟
- ألم في أسفل البطن أو الحوض
- ألم شديد بيبدأ قبل الحيض بأيام وبيكمل بعدها
- ألم أثناء العلاقة الحميمية
- ألم أثناء التبول أو التبرز
- انتفاخ
- غثيان
- تأخر الحمل
إيه المشاكل اللي ممكن يسببها كيس الشكولاتة؟
- صعوبة في الحمل بسبب الالتهابات والالتصاقات على المبيض وقنوات فالوب
- انفجار الكيس أو التواء المبيض، ودي حالة طوارئ بتسبب ألم حاد ومفاجئ وبتحتاج تدخل سريع وكشف في الطوارئ
إيه الحل؟
للأسف مفيش علاج واحد بيقضي على بطانة الرحم المهاجرة نهائيًا، لكن طريقة العلاج بتختلف حسب حالتك، الأعراض، وحجم الكيس، وده بيحدده الدكتور المعالج.
في بعض الحالات، لو الكيس صغير والأعراض بسيطة، ممكن الدكتور يكتفي بالمتابعة الدورية بالسونار.
وفي حالات تانية، ممكن يوصي بالعلاج الهرموني زي حبوب منع الحمل، عشان يساعد في تنظيم الدورة وتقليل الالتهابات والألم المصاحب.
ولو الحالة محتاجة تدخل أكتر، أو لو فيه تأثير على الخصوبة أو ألم شديد، ممكن الدكتور يرشّح إزالة الكيس عن طريق المنظار.
كيس الشوكولاتة والألم المصاحب ليه مش حاجة سهلة ولا مجرد ألم دورة عادي، ده علامة إن جسمك محتاج اهتمام ومتابعة مع متخصص، وإنتِ مش لوحدك في ده.