إزاي وسائل منع الحمل بتأثر على الإفرازات المهبلية؟

الإفرازات المهبلية بطبيعتها بتتأثر بتغيّرات الهرمونات اللي بتحصل خلال الدورة الشهرية. يعني في أيام تكون الإفرازات شفافة وسائلة أكتر (زي أيام التبويض لما هرمون الاستروجين بيزيد)، وفي أيام تانية بتكون أثقل أو أكتر بياض ( ايام مرحلة الجسم الأصفر).

وسائل منع الحمل الهرمونية عمومًا – زي الحبوب، الحقن، اللولب الهرموني، والزرعات – بتأثر على طبيعة الإفرازات المهبلية من حيث الكمية، القوام و اللون. غالبًا بتخلي الإفرازات أكتر سُمك ولزوجة، وبتكون لونها أبيض أو شفاف، و ممكن تستمر بشكل شبه ثابت طول الشهر، من غير التغيّرات المعتادة اللي بتحصل في الدورة الطبيعية.

ده بيحصل لإن الوسائل الهرمونية دي غالبًا بتمنع التبويض، وبالتالي مش بيكون في ارتفاع وانخفاض في مستويات الإستروجين والبروجيستيرون زي ما بيحصل في الدورة الشهرية العادية، وده بيأثر على مخاط عنق الرحم وطبيعة الإفرازات.

الإفرازات اللي بتحصل بسبب الوسيلة غالبًا طبيعية، خصوصًا لو:

• لونها أبيض أو شفاف
• مفيهاش ريحة قوية أو كريهة
• مش معاها حكة أو حرقان

لكن لو حصل أي تغيير مش مريح، يبقى الأفضل تزوري دكتور مختص علشان تتأكدي إن مفيش التهابات أو عدوى مهبلية.

لو بدأتِ وسيلة منع حمل جديدة ولاحظتي إن الإفرازات المهبلية اتغيّرت، ده مش بالضرورة حاجة تقلق. جسمك بيتفاعل مع الهرمونات، وده طبيعي.