دليلك لفحوصات تشخيص الأورام الليفية

لو الدكتور شَكّ إن عندك أورام ليفية، ممكن يطلب واحد أو أكتر من الفحوصات دي علشان يتأكد:

السونار المهبلي أو البطني (Pelvic Ultrasound) الفحص ده بيتم بجهاز اسمه “التراسوند”، وده ممكن يتحط على البطن من برّه، أو يتدخل مهبليًا لو احتاجوا يشوفوا التفاصيل أكتر. الجهاز بيساعد الدكتور يشوف الحجم والشكل والملمس ويلاحظ لو في أي أورام أو نمو غير طبيعي.
الرنين المغناطيسي (MRI) ده فحص أدق شوية، بيستخدم مغناطيس قوي وتكنولوجيا متطورة علشان يطلع صور تفصيلية للأعضاء الداخلية، ومنها الرحم. الفحص ده بيساعد الدكتور يحدد بالضبط مكان الورم الليفي، شكله، وحجمه، وبيفيد جدًا في التخطيط للعلاج خصوصًا لو هيكون بسيط أو من غير جراحة كبيرة.
الأشعة بالصبغة على الرحم وقنوات فالوب (Hysterosalpingography) ده نوع من أنواع الأشعة السينية بيتعمل للرحم وقنوات فالوب باستخدام صبغة خاصة بتوضح الأعضاء دي في الصور. الهدف منها إن الدكتور يعرف إذا كان في أورام ليفية بتسد قنوات فالوب أو بتأثر على تجويف الرحم.
المنظار الرحمي (Hysteroscopy) الفحص ده بيتم باستخدام جهاز صغير بكاميرا اسمه “المنظار الرحمي”، بيتدخل من خلال المهبل وبيعدي من عنق الرحم علشان يشوفوا جوه الرحم مباشرة. مفيد جدًا لو محتاجين يشوفوا مكان الورم بدقة أو يخططوا لإزالته.

التاريخ المرضي والفحوصات الطبية بيساعدوه الدكتور يحدد نوع ومكان الورم الليفي، وده مهم علشان نعرف إزاي نتعامل معاه.

فيه ٣ أنواع رئيسية من الأورام الليفية، وكل نوع بيظهر في مكان مختلف في الرحم، وده بيأثر على نوع الأعراض اللي بتحسي بيها وكمان على خطة العلاج المناسبة.

فيه أورام ليفية بتكون جوه تجويف الرحم (submucosal)، ودي ممكن تسبب نزيف شديد أو مشاكل في الحمل.
وفيه اللي بتكون جوه جدار الرحم (intramural)، ودي ممكن تسبب ضغط وألم في البطن أو الظهر.
وفيه كمان اللي بتكون على السطح الخارجي للرحم (subserosal)، ودي غالبًا بتضغط على المثانة أو القولون وتسبب مشاكل في التبول أو الهضم.

في أوقات، لو الورم صغير ومفيش اعراض، بيكون الحل هو المتابعة بس. لكن لو في أعراض قوية، ممكن يرشّح لك علاج دوائي أو تدخل جراحي بسيط على حسب رغبتك في الحمل مستقبلا او لا.