التبويض
محتوى مخصص ل
١٩+
الرئيسية
الدورة الشهرية والهرمونات
لما بيكون عندك اي سؤال عن الدورة الشهرية، دايما الاجابة بتكون ليها علاقة بالهرمونات.
الدورة اتاخرت؟ – تلاقيها لخبطة هرمونات مش في المود؟ — ديه هرموناتك و PMS
علي قد ما الإجابة تبان نمطية، لكن في جزء من الحقيقة. دورتنا الشهرية بتتحكم فيها و بتنظمها فعلا مجموعة من الهرمونات، لما بيحصل اي تغير في مستوي الهرمونات دي، بتحصل توابع كتير منها السلبي ومنها الإيجابي. طب ايه الهرمونات اللي بتتحكم في كل جزء من حياتنا ديه؟
الهرمونات هي عبارة عن مواد كيميائية الجسم بينتجها علشان تتحكم في وظائف معينة. في الدورة الشهرية، في أربع هرمونات رئيسية ليهم أدوارهم:
١. الإستروجين: دوره هو بناء بطانة الرحم و تحفيز نمو الثديين و تنظيم المزاج. في الدورة الشهرية بيزيد مستوى الإستروجين في النص الأول من الدورة لتجهيز الرحم لاستقبال البويضة المخصبة.
٢. البروجسترون: دوره انه يحافظ على بطانة الرحم. في الدورة الشهرية بيرتفع مستوى البروجسترون بعد التبويض للحفاظ على بطانة الرحم استعدادًا للحمل، ولو محصلش حمل بينخفض البروجسترون و بطانة الرحم بتتساقط و تنزل على شكل الدم (بداية الحيض).
٣. هرمونات الغدة النخامية: هرمون محفز للجريب (FSH): بيحفز نمو البويضات في المبيض. هرمون لوتيني (LH): بيحفز إطلاق البويضة من المبيض (التبويض).
كل الهرمونات ديه بتشتغل مع بعض زي عقارب الساعة، كل تغير بيأثر على هرمون معين، لغاية اما الدائرة تكمل و تبدأ تاني كل شهر.
- في بداية الدورة: بينخفض مستوى الاستروجين والبروجسترون فيبدأ الحيض.
- في منتصف الدورة: بيرتفع مستوى الاستروجين و يحفز إطلاق هرمون LH، واللي بدوره بيؤدي للتبويض.
- بعد التبويض: بيرتفع مستوى البروجستيرون للحفاظ على بطانة الرحم، و بيكون منتظر هرمون خامس مش بيطلع الا لو كان في حمل، في غيابه مستوى بروجيسترون ينزل تدريجيا عشان نبدأ دورة جديدة.
التغيرات الهرمونية مش بس بتأثر على الدورة الشهرية لكن كمان على الحالة المزاجية والطاقة. مثلًا ارتفاع الاستروجين بيحسسك بطاقة ونشاط. و زيادة البروجسترون ممكن تسبب إحساس بالتعب أو الانتفاخ.
اي خلل او اضطرابات في الهرمونات ديه ممكن تأثر على طبيعة الدورة الشهرية، أشهرهم متلازمة تكيس المبايض اللى بتسبب عدم انتظام في الدورة الشهرية، وزيادة في الوزن، ونمو الشعر الزائد.
فهم الهرمونات ودورها في الدورة الشهرية بيخلينا عارفين اكتر عن جسمنا و قادرين نتوقع التغيرات الجسدية و المزاجية.
