الرياضة و البريود ؟

الرياضة في العموم مهمه جداً لاتباع نظام صحي في حياتنا، لكن لما بتيجي سيرة الرياضة مع البريود بتظهر لنا تساؤلات كثيرة في دماغنا ايه صح و ايه الغلط ؟

الدراسات أثبتت إن الأنشطة البدنية والتمارين الرياضية ليها تأثير كبير في تقليل اضطرابات الدورة الشهرية زي عُسر الطمث ومتلازمة ما قبل الحيض.

الأدلة بتقول أن ممارسة التمارين الرياضية لمدة تتراوح بين 45 إلى 60 دقيقة ، ثلاث مرات في الأسبوع أو أكثر، بغض النظر عن شدة التمرين، بتؤدي إلى تقليل ملحوظ في شدة آلام الدورة الشهرية و الانتفاخ وآلام الثدي ده بسبب الهرمونات الي بتخرج لما بنتحرك أو نتمرن.

التمارين الرياضية كمان بتزود إنتاج الاندورفين (الهرمونات اللي بتخلينا نحس بالراحة) وتقلل القلق والاكتئاب وتحسن المزاج، كمان بتقلل نسبة الكورتيزول و البروستاجلاندين و دول الهرمونات المسؤولين على انقباضات الرحم والآلم الي بتيجي وقت الحيض ، و تزود كمان قدرة على تحمل الألم.

نيجي بقي للأسئلة المشهورة:

• هو ينفع ألعب رياضة وانا عندي البريود ؟ ايوة مفيش أي ضرر من الرياضة على جسمك، بالعكس ده هيساعدك في التحكم في الأعراض . بالنسبة لناس كتير، أول يوم أو يومين من الدورة الشهرية ممكن ما يكونش أفضل وقت للتمرين. ده عادةً بسبب غزارة النزيف في البداية، اللي ممكن يخلي التمرين أصعب أو يتسبب في تعب أكثر من المعتاد فا ممكن تعملي تمرينات خفيفة زي اليوجا او المشي لو عندك طاقة.

• هو ينفع العب سباحة وانا عندي البريود؟ أيوة، ممكن تروحي السباحة خلال الدورة الشهرية، ومفيش مشكلة لو استخدمتي الفوط الصحية المناسبة، دي كمان ممكن تساعد في تخفيف ألم الدورة لأن الحركة والمياه الباردة بتساعد على استرخاء العضلات.

• هو الرياضة ممكن تأثر على الدورة الشهرية ؟ التمارين الحادة أو اللي بتتطلب جهد بدني كبير لمدة طويلة زي الجري لمسافات طويلة و رفع الأثقال المستمر ممكن تسبب تأخير في الدورة الشهرية أو تخليها توقف تمامًا.