الPMS و الصيام
في ناس كتير بتلاحظ إن قبل الدورة بأيام، الصيام بيبقى أصعب بكتير. عصبية، صداع، رغبة في السكريات، إرهاق غير مبرر… وتحسي إنك مش فاهمة جسمك.
و ده لان قبل الدورة في المرحلة الجسم الاصفر/اللوتينية، هرمون البروجستيرون بيعلى، وده بيعمل شوية حاجات مهمة: • بيرفع حرارة جسمك شوية • بيزود احتياجك للطاقة • بيقلل حساسية جسمك للإنسولين • بيخلي مزاجك أكثر عرضة للتقلب
ولما ييجي الصيام فوق ده كله؟ جسمك بيبقى محتاج طاقة أكتر، وفي نفس الوقت مفيش أكل لساعات طويلة ف مستويات السكر الدم بتنزل أسرع و الأعصاب تبقى مشدودة و الرغبة في الحلويات تعلى جدًا وقت الفطار.
وده مش ضعف منك وقت الصيام، لكن ديه طبيعة الجسم
إزاي تتعاملي مع الاعراض و تقللي منها ؟
ما تعتمديش على السكريات كأول حاجة تدخل معدتك ،افطري على بروتين الأول، هيبطّأ امتصاص السكر، يثبّت مستوى سكر في الدم و يقلل اي رغبة مفاجئة في الحلويات
بلاش نعمل الحاجات دي وقت الفطار:
- نبدأ بكنافة/عصير
- نفطر على نشويات بس
- ناكل بروتين و خضار قليل جدًا
- نسيب البروتين لآخر الوجبة
اما فى السحور
- زودي دهون صحية في السحور (طحينة، مكسرات، زيت زيتون)
- زودي من الخضار لانه بيزوّد الإحساس بالشبع ويريّح القولون
- نامي بدري… لأن قلة النوم بتزود أعراض PMS ١٠ أضعاف
الفكرة إنك تفهمي جسمك وتشتغلي معاه مش ضده و تبني عادات صحية اكتر