الدورة جت بدري ؟ ايه الي حصل

بتتابعي دورتك الشهرية، وفجأة لقيتيها جات بدري عن معادها واتخضّيتي ومش عارفة السبب؟ ما تقلقيش، لأن ده بيحصل مع سيدات كتير، وبيكون في الغالب نتيجة أسباب طبيعية ومؤقتة. في البداية، مهم تتأكدي إنك متابعة دورتك كويس، لأن ساعات بنفتكر إنها جات بدري، لكن هو ده معادها الحقيقي حسب دورتك الشهرية.

##لو دورتك منتظمة وفجأة قدمت عن معادها ففي أسباب مؤقتة زى:

تغيير في نظام الأكل أو فقدان/زيادة وزن بشكل مفاجئ.
ممارسة رياضة جديدة أو زيادة المجهود البدني.
تغيير في نمط نومك أو قلة في الراحة.
التوتر أو الضغط النفسي، وده من أكتر الحاجات اللي بتأثر على توازن الهرمونات.
ممكن كمان يكون ده مش دورة حقيقية: أوقات بيحصل تنقيط خفيف في فترة التبويض، لونه بيكون وردي خفيف أو بني، وكميته قليلة.

لكن، لو التغيرات دي بدأت تتكرر أو حصل معاها أعراض غير مريحة، ده ممكن يكون مؤشر على مشاكل صحية محتاجة متابعة زى:

اضطرابات في الغدة الدرقية (نشاط أو خمول).
تكيسات على المبيض.
بطانة الرحم المهاجرة.
التهابات في المهبل أو عنق الرحم.
أمراض منقولة جنسيًا.

السن بيفرق كتير في تحديد السبب ورا أي تغيير في ميعاد الدورة الشهرية. فالبنت في بداية البلوغ جسمها لسه بيتأقلم مع التغيرات الهرمونية الجديدة، وده طبيعي يخلي الدورة مش منتظمة شوية في الأول. لكن لما توصلي لسن الخصوبة، خصوصًا لو متزوجة أو بتستخدمي وسيلة منع حمل، بيبدأ جسمك يتأثر بعوامل تانية. وسائل منع الحمل – سواء كانت حبوب، لولب، أو حقن – ممكن تسبب تغييرات في مدة الدورة أو حتى توقفها لفترة.

لو بدأتي تقرّبي من سن الأمان (سن انقطاع الطمث)، الجسم بيمر بتغيرات هرمونية كبيرة، وده بيأثر على انتظام الدورة الشهرية، فممكن تيجي بدري أو تتأخر عن معادها المعتاد.

لما الدورة تيجي بدري ده ممكن يأثر عليا ازاي؟

لو الدورة بتنزل بكميات غزيزة أو لفترات طويلة (أكثر من مرة واحدة في الشهر)، ممكن يحصل نقص في الحديد وأنيميا.
ممكن يأثر على الحياة اليومية و يسبب صعوبة في الانتظام الجامعة أو الشغل.
ممكن يكون علامة على مشاكل صحية محتاجة استشارة طبية.

لو لاحظتي إن الدورة بتتكرر بدري أكتر من مرة أو مرتين، أو الدم بينزل بكميات كبيرة ومعاه أعراض زي الدوخة أو الخمول، أو لو الألم بقى شديد لدرجة مأثرة على قدرتك تعيشي يومك بشكل طبيعي، ساعتها بننصحك تروحي لدكتور مختص، علشان تتأكدي إن كل حاجة تمام وتطمني على صحتك.