طرق فعّالة لتخفيف آلام الدورة الشهرية - ايه تاني غير القرفة ;).
اغلبنا رابط وقت الدورة الشهرية بالوجع و التعب، خصوصًا في أول يومين. آلام الدورة الشهرية بتختلف في شدتها من شخص للتاني. اوقات ممكن يكون وراها سبب صحي زي بطانة الرحم المهاجرة (الإندومتريوزيس) أو الأورام الليفية في الرحم، هنا بيكون مهم نكشف عند الدكتور لإستبعاد أى سبب طبي. ساعات برده مبكونش ليها سبب طبي واضح زي اغلب الحالات، وممكن تكون بتقل مع تقدم العمر، أو تتحسن في أحيان كتير بعد الولادة.
جربنا نصايح اواخدنا مسكنات عشان نخفف من الالم، لكن مش كل حاجة بتدي نفس النتيجة. دي شوية حاجات هتساعدك تخففي من آلام الدورة الشهرية:
1. القربة (المياه السخنة)
الكمادات الدافية أو قربة المية الدافية بتساعد على توسيع الأوعية الدموية وبتحسن من تدفق الدم، وده بيقلل من التقلصات اللي بنحس بيها اول يومين.
2. الأعشاب الطبيعية
القرفة من أكثر الأعشاب المشهورة في تخفيف آلام الدورة عشان بتساعد في استرخاء عضلات الرحم و بتزود من تدفق الدم وده بيقلل الاحتقان بشكل طبيعي وبيخفف الألم. لكن لو مش بتحبي القرفة في بدايل تانية كتير و بنفس الفعالية زي الزنجبيل، النعناع، والشمر. - الزنجبيل الزنجبيل يعتبر من أقوى الأعشاب اللي بتساعد في تقليل الالتهابات وتخفيف التقلصات و كمان بيساعد في تحسين الحالة المزاجية أثناء البريود. - النعناع النعناع معروف بتأثيره المهدئ اللي بيخفف من تقلصات المعدة وألم العضلات. كمان الزيت العطري اللي في النعناع بيشتغل كمسكن طبيعي وبيساعد على استرخاء العضلات. - الشمر الشمر بيعتبر من الأعشاب اللي ليها تأثير قوي في تخفيف التقلصات، وبيحتوي على مضادات للأكسدة اللي بتحارب الالتهابات. بالإضافة إنه بيساعد في تنظيم الهضم وتقليل الانتفاخ اللي بيحصل أثناء الدورة. جدير بالذكر اننا نبعد عن القهوة في الفترة ديه لانها ممكن تزود في التقلصات.
3. الرياضة
زي ما قولنا قبل كده، الحركة الخفيفة زي المشي أو التمارين البسيطة زي اليوغا بتزود تدفق الدم وبتفرز هرمونات السعادة زي الإندورفين، اللي بيساعدوا في تخفيف الألم.
4. المسكنات
بنلجألها اخر حاجة لو كل الحاجات الطبيعية منفعتش معانا. في نوعين من المسكنات مضادات الالتهاب غير الستيرويدية، وتُعرف اختصارًا بـ NSAIDs و الباراسيتامول، بيساعدوا في تخفيف الألم وتقليل الالتهاب وتخفيض الحرارة. ومن أشهرها بروفين، الفولترين، كيتوفان و نابروكسين والباندول.
مهم جدا اننا منعديش الجرعة المسموحة المكتوبة في نشرة كل دواء و نخلي بالنا ان كثر المسكنات ممكن يسبب قرح في المعدة و يأثر على الكلى.