الثلث الثالث من الحمل: تحضيرات الولادة
الثلث الثالث من الحمل بيبدأ من الشهر السابع لحد لحظة الولادة، وده الوقت اللي بتحسي فيه إن الرحلة قربت تكمّل. جسمك بيبذل مجهود كبير، والبيبي بيكبر بسرعة ملحوظة، فبتبقى المرحلة دي مليانة تغيّرات جسدية ومشاعر متلخبطة شوية بين الحماس، الشوق، والقلق الطبيعي قبل الولادة.
إيه اللي بيحصل لجسمك في الثلث الثالث؟
- البطن بيكبر أكتر مع زيادة حجم البيبي، بطنك بتبقى واضحة جدًا، وممكن تحسي بثِقل أو ضغط أكتر على المثانة، وده يخلي دخول الحمام متكرر.
- حركة البيبي بتبقى أوضح وأقوى الحركة بتكون منتظمة وواضحة، وممكن تحسي برجفة أو تمدّد، وكمان البيبي يبدأ يغيّر وضعه استعدادًا للولادة.
- آلام الظهر والحوض وجع الظهر والحوض شائع جدًا في المرحلة دي، بسبب زيادة الوزن وتوسّع الرحم وعشان الجسم يستعد للولادة.
- تورم خفيف تورم بسيط في الإيدين أو الرجلين بيكون طبيعي، لكن لو زاد أو صاحبه صداع شديد أو زغللة و ضغط عالي، مهم تراجعي دكتورك فورًا لان ده ممكن يكون مؤشر لتسمم حمل.
- صعوبة في النوم أو النفس أحيانًا كبر حجم البطن ممكن يضغط على الحجاب الحاجز، فالنوم يبقى أصعب شوية. جربي تنامي على جنبك وتستخدمي وسادة لدعم البطن والظهر.
نمو البيبي في الثلث الثالث:
البيبي بيكبر وزنه بسرعة لحد ما يوصل ل٢٥٠٠-٣٠٠٠ جرام. كل الاعضاء بتكون اكتملت و رئته بتبدأ تجهز للتنفس من شهر التاسع. حوالي ٩٥٪ من البيبيهات دلوقتي بيكونوا في وضع الرأس لتحت، وهو الوضع الأفضل للولادة. المشيمة لسه المصدر الأساسي للتغذية والأكسجين للبيبي، فاستمري على تغذية صحية ومتوازنة.
نصايح عملية للثلث الثالث:
- كلي وجبات صغيرة على مدار اليوم عشان تقللي من احساس الحرقان، ارتجاع المرئ و تحسنى الهضم.
- اشربي مياه كتير عشان تقللى من الجفاف والتورم.
- اعملي تمارين خفيفه زي المشي أو تمارين كيجيل لتقوية عضلات الحوض و الظهر استعدادًا للولادة.
- حاولي تلاحظي حركة البيبي يوميًا وتعدّيها خاصة في الشهر التاسع، وأي نقص فيها أو تغير مفاجئ استشيري دكتورك فورًا.
- طول ما دكتورك سامح، الحركة مهمة ومفيدة. كمّلي تمارين الحمل الآمنة زي المشي أو التمارين الخفيفة لحد قرب موعد الولادة، لأنها بتساعد على تحسين الدورة الدموية وتجهيز الجسم للولادة.
- حضّري شنطة الولادة وراجعي خطة الولادة مع دكتورك.
- التزمي بمواعيد المتابعة في الثلث الثالث لان في الفترة دي هتكون المتابعة أقرب شوية، وبتشمل فحص سكر الحمل حوالي الأسبوع 28 لو ما اتعملش قبل كده و تحليل أنيميا في الشهر السابع وكمان في الشهر التاسع، الدكتور ممكن يعمل فحص داخلي لعنق الرحم علشان يشوف هل بدأ يلين أو يفتح استعدادًا للولادة.
الاهم من ده كله ان مع قرب الولادة، ركزي على علامات الطلق الحقيقية زي نزول البيبي، الإفراز الدموي، ضغط الحوض، تقلصات الولادة (تحجيرة في بطن كلها) ، ونزول المياه، علشان تعرفي اللحظة الصح للذهاب للمستشفى