دليلك السريع لفهم الإفرازات المهبلية
مع بداية البريود بيكون في تغييرات بتحصل في الافرازات المهبلية ومهم نعرف نفرق بين الافرازات الطبيعية والافرازات الغير طبيعية.
الافرازات الطبيعية بتكون شفافة ومابيكونش ليها ريحة سيئة وبتختلف من وقت للتانى على مدار الشهر، يعنى مثلا في افرازات بتحصل قرب وقت التبويض ودي بتكون شفافة ومطاطية وشكلها أقرب لبياض البيض ودى افرازات طبيعية.
قبل واثناء البريود شكل الافرازات بيتغير فبتبقي مايلة للون البنى شوية او أحيانا الزهري ودي معناها ان الجسم بيتخلص من بقايا الدم والانسجة.
الافرازات الغير طبيعية: ودي نقدر نميزها عن طريق ان ليها لون غير عادى (اصفر او اخضر او رمادي) او ريحة مش كويسة او مسببة حكة شديدة، لأن في الحالة دي وارد تكون إشارة لحدوث التهاب او عدوى او وجود بكتيريا وفى الوقت ده الأفضل نستشير دكتور متخصص عشان نتأكد ان مافيش مشاكل او لو في مشكلة نقدر نعالجها من بدري.