غزارة الطمث: بتدل على ايه؟
تحديد إذا كانت الست فعلاً بتعاني من دورة شهرية غزيرة مش دايمًا بيكون واضح أو سهل و ده لان مفهوم “النزيف الغزير” بيختلف من واحدة للتانية — يعني اللي واحدة ممكن تعتبره طبيعي، ممكن واحدة تانية تشوفه زيادة عن اللزوم.
غزارة الطمث ممكن تكون مشكلة مؤقتة، و ممكن تكون علامة على مشاكل صحية محتاجة اهتمام وعلاج. عشان كده، مهم نفهم يعني إيه غزارة طمث ، ازاي تفرقي بين الدورة الطبيعية والغزيرة، وايه الأسباب وإمتى تروحي للدكتور.
إيه هي غزارة الطمث؟
غزارة الطمث معناها إن الحيض بيكون مدته أطول أو كمية الدم اللي بتنزل وقت الحيض أكثر من العادي. مرحلة الحيض في الدورة الشهرية بتكون ما بين ٢ إلى ٧ أيام مع تدفق دم بيتراوح بين ٣٠ إلى ٨٠ ملليتر تقريبًا (حوالي ٦ معالق). لو بدأتي تلاحظي إن دم الحيض زاد عن المعتاد، أو الدورة الشهرية استمرت لفترة أطول من ٧ أيام، فده ممكن يكون مؤشر على غزارة الطمث.
إزاي تعرفي إن عندك غزارة طمث؟
ممكن تكوني بتعاني من غزارة الطمث لو:
- بتغيري الفوط الصحية كل ساعة أو ساعتين عشان اتملت بسرعة.( يعني اكتر من ٦ فوط في اليوم)
- الدورة بتقعد أكتر من ٧ أيام.
- بينزل معاها تجلطات دموية كبيرة في الحجم.
- بتحسي بتعب أو دوخة أو عندك إنيميا بسبب كمية الدم اللي بتفقديها.
ايه سبب غزارة الدم ؟
- التغيرات الهرمونية: الهرمونات زي الإستروجين والبروجستيرون بتلعب دورًا كبيرًا في تنظيم الدورة الشهرية. أي اختلال في التوازن الهرموني ممكن يسبب غزارة الطمث بسبب تراكم بطانة الرحم (زيادة في سمك البطانة فينزل دم أكثر)، بذات في مراحل معينة من الحياة زي سن البلوغ أو فترة ما قبل انقطاع الطمث.
- الأورام الليفية الرحمية: الأورام الليفية هي أورام غير سرطانية ممكن تظهر في الرحم بتسبب نزيفً أو دورة أطول من المعتاد.
- التهاب بطانة الرحم: التهاب بطانة الرحم أو “التهاب الأنسجة في الرحم” ممكن يسبب نزيف شديد أثناء الدورة الشهرية.
- أمراض الدم: زي مرض الهيموفيليا أو التجلط الدموي اللي بتؤثر على سيولة الدم.
- الاضطرابات الهرمونية بسبب الأمراض المزمنة: زي مرض السكري (مقاومة الانسولين) أو اضطرابات الغدة الدرقية والسمنة.
- الأدوية و موانع الحمل: زي اللولب و الحقن أو الأسبرين أو أدوية السيولة اللي بتستخدم لعلاج أو منع الجلطات الدموية.
لو بتعاني من غزارة الطمث بشكل متكرر ، أو لو الدورة بتيجي معاها وجع جامد، يبقى لازم تروحي تكشفي عند دكتور متخصص. علشان يحدد السبب، ممكن يطلب منك تعملي شوية فحوصات، زي:
- تحليل هرمونات
- سونار أو أشعة عشان يشوف إذا كان فيه أورام ليفية أو مشاكل في الرحم
- تحليل دم عشان يطمن على نسبة كرات الدم الحمراء و الحديد أو يتأكد مفيش مشاكل في تجلط الدم ( خصوصا لو في تاريخ شخصي أو عائلي مع مشاكل في تجلط الدم و النزيف)
- أخذ عينة من بطانة الرحم: خصوصًا لو الدورة غزيرة جدًا أو غير منتظمة عند ستات فوق سن الـ ٣٥.
الفحوصات دي بتساعد في تشخيص الحالة بدقة، واختيار أنسب طريقة للعلاج سواء بأدوية، تغييرات في نمط الحياة، أو تدخل طبي لو لزم الأمر.