مرحلة ما قبل انقطاع الطمث - ممكن أتوقع إيه؟

إنتي في الأربعينات، بتصحي من النوم بالليل غرقانة عرق، والدورة الشهرية بقت مش منتظمة وغالبًا بيكون معاها نزيف شديد: الاحتمال الكبير انك بتمري بمرحلة ما قبل انقطاع الطمث.

انقطاع الطمث هو لحظة معينة في الزمن، لكن مرحلة ما قبل انقطاع الطمث (بيريمينوبوز) هي حالة انتقالية ممتدة، المعدل المتوسط لمدة المرحلة دي هو من ٣ ل٤ سنين، لكن ممكن تستمر لعدة شهور أو تمتد لحد عشر سنين. و بتنتهي بعد سنة من آخر دورة شهرية. في الفترة دي الدورات شهرية بتبقى غير منتظمة وده بسبب تراجع فى وظيفة المبايض.

كتير من الستات بيواجهوا مجموعة من الأعراض مع تغيّر هرموناتهم خلال الشهور أو السنين اللي بتسبق سن انقطاع الطمث، واللي بيكون عادة مابين ٤٥ لـ ٥٥ سنة. المرحلة دي، اللي بنسميها البيريمنوبوز، بتختلف بشكل كبير من ست لست، لأن الأعراض والتجارب بتكون متنوعة جدًا. فيه ستات تانية مبيحسوش بأي أعراض مزعجة أو مؤلمة. كمان، الدورة الشهرية ممكن تنتهي بشكل مفاجئ لبعض الستات،

الأعراض المحتملة في مرحلة ما قبل انقطاع الطمث:

• تغيرات في الدورة الشهرية: ممكن تلاحظي إن الدورة تبقى غير منتظمة، يا تقصر أو تطول او كمية دم الحيض زادت.

• هبات الحرارة (هوت فلاش): إحساس مفاجئ بالحرارة والتعرق المفرط.

• جفاف بالمهبل

• تغيرات في المزاج والنوم: القلق، التوتر، ومشاكل في النوم.

• تغيرات في الوزن والشهية: ممكن تلاحظي زيادة في الوزن أو تغيرات في الشهية.

  أكثر الأعراض المزعجة هي هبات الحرارة، غير العلاج حاولي تعرفي لو فيه اي محفزات بتسبب لك هبات الحرارة عن طريق تسجيلها وملاحظة أي نمط متكرر بالذات مع تناول أطعمة ومشروبات معينة. مثلاً، القهوة، أو الشاي (الكافيين)، أو الكحول، أوالأكل الحار. غير الأكل والمشروبات ممكن التوتر والضغط النفسي أو درجات الحرارة الدافئة تسبب هبات الحرارة. كمان ممكن تعملي شوية تغيرات في نمط الحياة ممكن تساعدك خلال فترة البرمينوبوز:

• اتبعي نظام غذائي صحي فيه فواكه وخضروات وحبوب كاملة و قللي الزيوت و الدهون. مهم تعرفي ان انخفاض مستويات الإستروجين ممكن تسبب زيادة الكوليسترول منخفض الكثافة (LDL) أو ما يُعرف بالكوليسترول “الضار”. اللي بتساهم في زيادة خطر الإصابة بأمراض القلب.

• اتأكدي انك بتاخدي كميات كافية من الكالسيوم (من 1000 لـ 1200 مجم يوميًا) و فيتامين د سواء من الطعام أو المكمل غذائي للحماية من هشاشة العظام.

• مارسي التنفس العميق (تقنية تنفس) اللى بتساعد في تخفيف هبات الحرارة.

• زودى من الاكل الي بيعلي الاستروجين زي نبات الكوهوش الاسود و السمسم

بعض العلاجات اللي ممكن يُوصي بيها الدكتور عشان تساعد في التخفيف الأعراض زي العلاج الهرموني و جابابنتين او الكلونيدين (دواء بيُستخدم لعلاج هبات الحرارة). مهم جداً تستشيري طبيبك لو كانت أعراض مرحلة ما قبل انقطاع الطمث (البرمينوبوز) بتأثر بشكل كبير على حياتك اليومية.