اول مرة بريود
البريود اما بتحصل لأول مرة بتكون عادة مصحوبة بشوية قلق وتوتر عند البنات لأنهم مش بيكونوا فاهمين اوى ايه اللي بيحصل، البريود بتبدا بنزول دم من المهبل وده حاجة طبيعية بتحصل كل شهر.
الدورة الشهرية بتبدأ عادة بين سن 10 – 15 سنة وبتفرق حسب طبيعة كل بنت بس كمان مؤخرا منظمة الصحة العالمية قالت ان في بنات ممكن البريود تبدأ عندها في سن 8 سنين ومهم نكون عندنا معلومات ومستعدين ومانقلقش لو حد من اصحابنا جاتلها البريود قبلك لان في فروقات بين اجسامنا.
في بعض الحاجات اللي ممكن تحصل تخليكى متوقعة ان البريود قربت زي تغييرات في المود او تقلصات في البطن والضهر او الرجلين بس أحيانا الاعراض دي بتتغير من شهر للتانى بس بعد شوية بيبقى أسهل ان احنا نميز العلامات دي ونعرف ان البريود قربت.
في البداية أحيانا بتكون البريود مش منتظمة وده بسبب تغييرات الهرمونات في الجسم والجسم بياخد شوية وقت لحد ما البريود تتظبط وتنتظم وعشان كده متابعة البريود بابليكيشن حاجة بتسهل ده بشكل كبير لأنك بتقدرى تحددي البريود بتاعتك بتيجى كل وقت اد ايه وبتستمر كام يوم وتقدري تلاحظي أي تغيير او عندم انتظام يحصل بسهولة.
العوامل اللي بتأثر في انتظام البريود كتير زي التوتر، وتغييرات الهرمونات، والأكل، والصحة العامة.
في الفترة دى مهم الراحة والاهتمام بالنظافة الشخصية وشربات كميات مناسبة من المياه و السوائل ،وكمان استخدام فوط صحية مناسبة وملابس مريحة وتجنب الملابس الضيقة والحاجات اللي بتسبب تهيج.
في تغييرات كتير بتبقي مصاحبة للبريود وبتكون من ضمن علامات البلوغ زي مثلا تغيير حجم الثدي وظهور الشعر في بعض الأماكن زي الابط ومنطقة البيكيني والرجلين وكمان بيكون في تغييرات في الافرازات المهبلية وكمان تغيير في شكل الجسم عموما زي زيادة الوزن او الطول وبيزيد الإحساس بالتوتر او القلق لان إحساس البريود بيكون جديد عموما بالنسبة للبنات ومش كل البنات بتكون عارفة تتعامل معاه ازاى ومهم ان احنا نتكلم مع حد بنثق فيه او نحاول نقرا ويكون عندنا معلومات كفاية من مصادر موثوقة عشان نعرف نتعامل مع الفترة دي من كل شهر.
احنا في عزيزة بنحاول دايما نوفر لكوا كل المعلومات اللي مهم تكونوا عارفينها وابعتولنا أكترعالإيميل الموضوعات اللي حابين نتكلم فيها: info@aziza.app