اكياس المبيض
كتير من البنات والستات بيسمعوا عن “أكياس على المبيض”، وساعات الكلمة دي بتخوف، خصوصًا لو جات في نتيجة سونار فجأة. بس الحقيقة إن أكياس المبيض حاجة شائعة جدًا، وفي أغلب الأوقات مش خطيرة خالص.
أكياس المبيض هي ببساطة “كيس فيه سائل” بيتكون على المبيض، وممكن يكون بسيط (يعني شكله عادي وواضح في السونار). و في العادة بيتم اكتشافه بالصدفة أثناء كشف روتيني أو سونار لأي سبب تاني.
هل الأكياس دي بتعمل أعراض؟
معظم الأكياس ما بتعملش أي أعراض خالص، وممكن تروحي الكشف وتتفاجئي إن عندك كيس وانتي مش حاسة بحاجة. بس في بعض الحالات، ممكن الكيس يسبب:
- وجع بسيط أو إحساس بالامتلاء في البطن
- وجع بييجي ويروح من وقت للتاني
- وجع حاد أو مفاجئ (وده ممكن بيحتاج تدخل طبي فورًا)
- وجع في أوقات معينة من الدورة الشهرية
لو الكيس انفجر، أو حصل نزيف جواه، أو لَفّ حوالين نفسه (تويست أو torsion)، دي بتكون حالات طبية طارئة ولازم تتوجهي للدكتور فورًا.
الخطورة أو نوع التعامل مع الكيس بيعتمد على الحجم والنوع. الأكياس الصغيرة اللي أقل من ٥×٥ سم عادة بيتتابعوا بس، من غير أي تدخل، خصوصًا لو مافيش أعراض. اما الأكياس الكبيرة ممكن تحتاج تدخل أو علاج حسب الحالة.
أنواع أكياس المبيض:
مش كل الأكياس زي بعض، ودي أشهر الأنواع:
- الأكياس الوظيفية (Functional Cysts): دي أكتر نوع شائع، وغالبًا بتختفي لوحدها.
- كيس الجسم الأصفر أو النزيفي (Corpus luteum / hemorrhagic cyst): تاني أكتر نوع شائع، وبيظهر بعد التبويض.
- الكيس الجِلدي (Dermoid cyst): ممكن يحتوي على أنسجة زي شعر أو دهون، وده بيحتاج متابعة خاصة.
- الكيس الشوكولاته (Chocolate cyst أو Endometrioma): بيكون مرتبط بمرض اسمه بطانة الرحم المهاجرة.