الرئيسية
مرحلة البلوغ و المراهقة: مش بس تغيرات جسدية
البلوغ هو مرحلة هتعدي علي كل بنت. دي فترة بتبدأ فيها أجسامنا وعقولنا تمر بتغيرات كبيرة، وده بيكون بداية الانتقال من الطفولة للمرحلة اللي بعدها. البلوغ عند البنات عادة يبدأ ما بين سن ٨ و١٣ وينتهي في سن الـ ١٧ أو ١٩ لما تظهر أغلب علامات البلوغ.
١. التغيرات الجسدية:
بتحصل بسبب التغيرات الهرمونية، خصوصًا زيادة هرمونات النمو و هرمونات الأنوثة زي الإستروجين والبروجستيرون. الهرمونات دي بتسبب مجموعة من التغيرات الجسدية الملحوظة زي:
- تطور الثديين (الصدر): أول علامة في البلوغ هي تطور الثديين. ده بيبدأ على هيئة كتل صغيرة تحت الحلمة، وبعد شوية بيتطوروا ويبقوا ثديين كاملين مع مرور الوقت.
- الزيادة في الطول: البنات بيكبروا بسرعة كبيرة في سن 10-11 سنة، وبيزيد طولهم بشكل ملحوظ و شكل الجسم بيبدأ يتغير زي ان بيحصل زيادة في نسبة الدهون حوالين الأرداف والجسم بيتغير شكله. ممكن البنت تلاحظ زيادة في الدهون في الجسم، خصوصًا حوالين الفخذين والثديين، وده بيدي الجسم شكل أكتر استدارة.
- تغيرات في البشرة والشعر: ممكن البنت تلاحظ زيادة في إفراز الدهون في البشرة، وده ممكن يسبب حب الشباب. كمان الشعر في الجسم بيبدأ يصبح أكثر خشونة، ويمكن يظهر شعر تحت الإبط وفي منطقة العانة (البيكيني) و في الوش و الجسم.
- الدورة الشهرية (الطمث): عادة البنت بتبدأ أول دورة شهرية ليها(الحيض) ما بين سن 8 و16 سنة، في الأغلب سنتين بعد ظهور الثدي ودي علامة كبيرة بتدل على بداية المرحلة الإنجابية. لكن مش معني كده انها إنها جاهزة للإنجاب لإن الجسم لسه محتاج يكتمل نموه في فترة المراهقة، زي نمو عظام الحوض وانتظام دورة الهرمونات. الحيض هو جزء واحد من مراحل النمو، لكن لازم كل العمليات التانية في الجسم تكتمل عشان يكون الجسم مستعد للحمل بطريقة صحية وآمنة.
- في الاول طبيعي تكون الدورة مش منتظمة بحكم ان الجسم لسه بيتأقلم مع التغيرات الهرمونية.
٢. التغيرات النفسية والاجتماعية:
- تقلبات المزاج: التغيرات الهرمونية ممكن تؤدي لتقلبات مزاجية سريعة. البنت ممكن تحس بسعادة في لحظة، وبعدها تحس بالإحباط أو الحزن في اللحظة اللي بعدها.و ده طبيعي جدًا في فترة البلوغ.
- تكوين الهوية و رغبة في الاستقلال: البنات بتبدأ تكون شخصيتها وًهويتها و يبدأوا يسعوا لاستقلالهم بشكل أكبر. ده ممكن يسبب بعض الخلافات/ صعوبة في التفاهم مع الأهل، لأنهم بيبدأوا يحاولوا يفرضوا هويتهم الخاصة ويكون عندهم قرارات أكثر في حياتهم.
- الصورة الذاتية: التغيرات الجسدية في فترة البلوغ بتخلي البنات يقارنوا نفسهم بالصورة النمطية للجسم المثالي اللى بيخلقها المجتمع. خلي هدفك تحسين صحتك بدل من محاولة الوصول لمعايير مثالية مش واقعية زي اللي موجودة علي السوشيال ميديا.
- الاهتمام بالعلاقات الرومانسية: فترة البلوغ هي الوقت اللي تبدأ فيه البنات يشعروا بمشاعر إعجاب أو حب. المشاعر دي بتكون مليانة بالحماس والارتباك أحيانًا، والبنت بتبدأ تكتشف عالم العلاقات العاطفية.
كل بنت مختلفة عن التانية. وده معناه إن الدورة الشهرية عند بعض البنات بتجي قبل البنات التانية و علامات البلوغ مش شرط تظهر كلها بنفس الترتيب. ممكن تحسي ان جسمك مليان عن صحابك أو يكون عندك صدر أكبر أو أصغر – ده شيء طبيعي، مايسببش أي قلق. مهم نعرف ان مفيش حاجة اسمها “الجسم المثالي”. كل جسم له طبيعته الخاصة، وأنتِ جميلة زي ما أنتِ.
لو البنت وصلت لعمر ١٤ سنة وما ظهرتش عليها أي علامة من علامات البلوغ، زي نمو الثدي أو تغيرات الجسم، يفضل تزور طبيب متخصص. ده لأن ممكن يكون في مشكلة في هرمونات النمو أو الأنوثة أو أي سبب طبي تاني محتاج متابعة. الكشف المبكر مهم جدًا للتعامل مع أي مشكلة وضمان صحة الجسم ونموه السليم.
مهم إنك دايمًا تعتمدي على مصادر موثوقة عشان تفهمي جسمك والتغيرات اللي بتحصل فيه خلال المرحلة دي. كمان، التعرف على جسمك بيساعدك تتعاملي مع التغيرات بشكل صحي وإيجابي.
