ايه هي نافذة الخصوبة؟
لو بتفكري في الحمل أو حتى حابة تفهمي جسمك أكتر، لازم تعرفي عن نافذة/فترة الخصوبة. الفترة دي هي الوقت اللي بتكون فيه فرصة الحمل أعلى، وبتبدأ قبل التبويض بأيام قليلة وبتنتهي بعده بوقت قصير.
ازاي احسب فترة/نافذة الخصوبة؟
بشكل عام، نافذة الخصوبة بتكون حوالي ٥-٧ أيام كل شهر:
- ٥ أيام قبل التبويض: لأن الحيوانات المنوية ممكن تفضل حية ومستعدة لتخصيب البويضة بمجرد خروجها.
- يوم التبويض نفسه: لما البويضة تخرج من المبيض وتكون جاهزة للتخصيب.
- ١٢-٢٤ ساعة بعد التبويض: لأن البويضة بتعيش لمدة قصيرة بعد خروجها.
يعني لو انتي متجوزة و حصل علاقة خلال الخمس أيام اللي قبل التبويض، في يوم التبويض نفسه، أو حتى في اليوم اللي بعده، فرص الحمل بتكون عالية جدًا. لو مش عايزة تحملي تجنبي الجماع في فترة الخصوبة، أو استخدمي وسائل منع الحمل اللي تناسبك.
لو عرفنا وقت التبويض، هنقدر نحسب فترة الخصوبة. لو دورتك منتظمة التبويض عادةً بيكون في منتصف الدورة الشهرية، بنعرفه عن طريق إننا نشوف الدورة الشهرية بتحصل كل أد إيه ونطرح من الإطار الزمني ده ١٤ يوم. (مثال: لو الدورة بتحصل كل ٢٨ يوم فده يخلينا نتوقع إن التبويض غالبا هيحصل يوم ١٤).
عزيزة هتساعدك تحسبي الفترة الخصوبة بكل سهولة.
في طرق تانية تساعدك تعرفي التبويض عن طريق إنك تتابعي علامات التبويض زي:
- متابعة الإفرازات المهبلية: خلال فترة الخصوبة، الإفرازات بتكون شفافة وملساء زي بياض البيض.
- قياس درجة الحرارة : بعد التبويض، درجة حرارة جسمك بترتفع شوية (حوالى 0.5 لـ 1 درجة مئوية).
- اختبارات التبويض منزلية: بتقيس هرمون اللوتيني (LH) اللي بيزيد قبل التبويض بـ ٢٤-٣٦ ساعة.
هل ممكن يحصل حمل خارج نافذة الخصوبة؟
فرصة الحمل بتكون أكثر في نافذة/فترة الخصوبة، لكن لو دورتك مش منتظمة، ممكن يحصل تبويض في وقت مختلف عن المتوقع، وده معناه إن فرص الحمل موجودة في أوقات تانية من الشهر. لتجنب ده ممكن تستخدمي علامات التبويض عشان تدلك.
فترة الخصوبة بتمكّنك من التخطيط لحياتك، سواء كنتِ بتسعي للحمل أو بتحاولي تتجنبيه. فهم دورتك الشهرية وفترة الخصوبة بتساعدك على اتخاذ القرارات المناسبة ليكي.