التبويض

التبويض عبارة عن ايه؟

التبويض مرحلة مهمة جدًا من الدورة الشهرية وفي المرحلة دي بيكون في بويضة جاهزة للتخصيب عشان يحصل حمل وفرصة الحمل في التوقيت ده بتكون كبيرة. بنعرف إزاي وقت التبويض عن طريق إننا نشوف الدورة الشهرية بتحصل كل أد إيه ونطرح من الإطار الزمني ده 14 يوم (مثال: لو الدورة بتحصل كل 28 يوم فده يخلينا نتوقع إن التبويض غالبا هيحصل يوم 14).

طبعًا فترة التبويض بتاعة كل ست مختلفة عن التانية وفي طرق مختلفة ممكن نستخدمها عشان نحدد فترة التبويض من ضمنها أعراض الجسم وتغييراته زي تغيير درجة حرارة الجسم الأساسية أو زيادة إفرازات المهبل. متابعة دورتك ومعرفة وقت التبويض (واللي بالمناسبة ممكن يتأثر بعوامل مختلفة زي التوتر أو لخبطة النوم أو حتى التغذية) هي أول خطوة في فهم صحتك الإنجابية لأنه بيساعدك تفهمي جسمك أكتر.

في شوية أعراض ممكن تحصل في فترة التبويض زي زيادة افرازات المهبل او الم خفيف في أسفل البطن او تغير في درجة حرارة الجسم، ولكن مش بالضرورة ان كل البنات والسيدات تحس بالأعراض دي. فهم عملية التبويض خطوة مهمة لصحة الستات وأنك تفهمي جسمك بشكل احسن وتحديدا لو في تخطيط للحمل لان بيكون في فرصة كبيرة في الوقت ده انه يحصل حمل، ولو بنخطط لتأجيل الحمل فمهم نعرف معاد التبويض ونتجنب العلاقة الزوجية في الفترة دي

يعني ايه فترة الخصوبة/نافذة الخصوبة؟

دول الخمس أيام اللي قبل يوم التبويض ويوم التبويض نفسه واليوم اللي بعده ودي الفترة اللي بيبقى فيها الجسم مستعد بدرجة كبيرة إنه يحصل حمل وعشان كده النصيحة اللي تتقدم لأي ست عايزة تحمل إنها تهتم بالعلاقة الزوجية في الفترة دي تحديدًا.