ايه هي علامات التبويض؟

التبويض هو واحدة من أهم مراحل الدورة الشهرية، وبيحصل لما البويضة تخرج من المبيض، وده بيكون الوقت اللي بتزيد فيه نسبة الخصوبة. الجسم بيدينا إشارات وعلامات واضحة خلال الفترة دي، واللي من خلالها ممكن نعرف أنسب وقت لحدوث الحمل أو نتجنبه حسب رغبتنا.

• ١. تغير فى الإفرازات: من أكتر العلامات اللي بتكون واضحة خلال فترة التبويض هي التغيرات في الإفرازات المهبلية. الإفرازات بتكون شفافة، لزجة، و شبه بياض البيض، وده بيساعد الحيوانات المنوية على الحركة عشان توصل للبويضه بسهولة.

• ٢. ارتفاع بسيط في درجة حرارة الجسم: في فترة التبويض، درجة حرارة الجسم الأساسية بتزيد شوية (حوالى 0.5 لـ 1 درجة مئوية)، تقدري تتابعي التغير ده لو قستي درجة حرارتك كل يوم الصبح.

• ٣. ألم بسيط أو وخز في أحد الجانبين: وقت خروج البويضة من المبيض،١ من كل ٥ ستات ممكن بيحسوا بألم خفيف أو مغص بسيط في جهة واحدة من أسفل البطن ودا بيكون وقت ما البويضة بتخرج من واحد من المبيضين. الظاهرة ديه اسمها ” Mittelschmerz”.

• ٤. زيادة في الرغبة الجنسية: بسبب التغيرات الهرمونية، ممكن تلاحظي إن رغبتك في العلاقة الزوجية بتزيد في الفترة دي.

• ٥.انتفاخ خفيف أو احتباس سوائل: ممكن تحسي إن جسمك منفوخ شوية أو عندك احتباس للسوائل و ده بسبب تغيزات الهرمونية اللي بتحصل في الفترة دى.

• ٦.حساسية وآلام الثدي: بسبب ارتفاع هرمون البروجستيرون، ممكن تحسي بألم بسيط أو انتفاخ في الثدي. حساسية الثدي مش مرتبطة بالتبويض بس، لكنها ممكن تحصل في أوقات تانية من الدورة بسبب التغيرات الهرمونية، خصوصًا قبل الدورة الشهرية أو خلالها.

• ٧. تغير في عنق الرحم: عنق الرحم بيكون أنعم، أعلى، ومفتوح شوية عن العادي خلال فترة التبويض.

• ٨. نزول نقط دم خفيفة (نزيف التبويض): في بعض الحالات، ممكن تلاحظي نزول نقط دم خفيفة أو إفرازات بنية. التنقيط ده بيحصل بسبب انفجار الجريب اللي بيطلع منه البويضة و تغيرات الهرمونات. غالبًا بيكون بسيط وبيستمر لفترة قصيرة.

مهم تعرفي إن أدق طريقة لتحديد وقت التبويض هي قياس مستوى هرمون اللوتيني (LH)، وده بيتم من خلال اختبارات التبويض المنزلية اللي بتقيس نسبة الهرمون في البول. زيادة هرمون LH بتكون إشارة واضحة إن التبويض هيحصل خلال الـ ٢٤ إلى ٣٦ ساعة الجاية.

عدم وجود أعراض تبويض واضحة مش معناه إن الخصوبة قليلة أو متأثرة. الستات ممكن يكونوا في فترة الخصوبة حتى لو ماحسوش بأي علامات واضحة للتبويض. كل العلامات دي مش شرط تظهر كلها في نفس الوقت و بتختلف من ست للتانية، لكن ملاحظة جسمك هتساعدك تعرفي إيه العلامات اللي بتحصل معاكي.