الانتفاخ خلال الدورة الشهرية: أسبابه وكيفية التعامل معه

الانتفاخ عرض من الأعراض المشهورة اللي بيحصل لـ 75% من الستات، بيظهر قبل ومع الدورة الشهرية، وكتير مننا بيحس إنه مزعج وبيأثر على الثقة بالنفس.

الجسم في الفترة دي بيحبس مياه وملح أكثر من الطبيعي بسبب التغيرات الهرمونية، وبالأخص هرمون الاستروجين والبروجيسترون اللي بيأثروا على توازن السوائل في الجسم. فيه عوامل تانية بتزود الانتفاخ زي قلة شرب المياه ونوعية الأكل، خصوصًا الأكل المملح والكربوهيدرات.

مدة الانتفاخ خلال الدورة الشهرية ممكن تختلف من شخص لآخر. ممكن يبدأ الانتفاخ قبل الدورة بحوالي أسبوع ويستمر ليومين بعد ما تبدأ. مش شرط مع كل دورة يكون في انتفاخ، لأن مستويات الهرمونات في الجسم بتتغير من دورة للتانية.

عشان تقللي من الانتفاخ في الوقت ده، محتاجة تغيري من نمط حياتك وتعملي الآتي:

تقللي من الملح في الأكل: قللي الأكل اللي فيه نسبة عالية من الصوديوم لأنه بيزود احتباس السوائل زي الأطعمة المعالجة (المعلبات و اللحوم المدخنة أو المعالجة زي السوسيس، الهامبرجر ولانشون)
تشربي مياه كتير: شرب المياه بيساعد على تقليل الانتفاخ وبينشط وظائف الكلى فتطرد الملح.
تاكلي أكل فيه بوتاسيوم: البوتاسيوم يوازن مستويات الصوديوم في الجسم ويقلل الانتفاخ. ركزي على الخضروات الورقية زي السبانخ و؟ وكمان الموز والبطاطا.
العبي تمارين خفيفة: النشاط البدني البسيط زي المشي أو اليوغا بيحسن الدورة الدموية وبيقلل الانتفاخ.
تجربي الأعشاب الطبيعية: شاي الزنجبيل أو الشمر اللي بيساعدوا على تحسين الهضم وتقليل الانتفاخ.
تقللي من الاكل الي بيزود الانتفاخ: البقوليات زي الفول والعدس و الألبان خاصة لو عندك حساسية أو صعوبة في هضم اللاكتوز

الانتفاخ عرض طبيعي وقت الدورة الشهرية وبيختفي وقت ما تخلص، لكن لو الموضوع مستمر معاكي طول الشهر، ممكن يكون السبب أمراض تانية زي متلازمة القولون العصبي وبطانة الرحم المهاجرة (الإندومتريوزيس). خلي بالك من الوقت اللي بيحصل فيه الانتفاخ، واتكلمي مع طبيب مختص لو الانتفاخ بيتكرر ومالوش علاقة بالدورة الشهرية. عزيزة ممكن تساعدك تسجلي وتتابعي العرض ده.