ليه الصداع بيزيد قبل الدورة في رمضان؟

لو لاحظتي إن الصداع بيجيلك أكتر في آخر ١٠ أيام قبل الدورة، فأنتى مش لوحدك.

في المرحلة الجسم الاصفر او اللوتينية، مستوى الإستروجين بينزل تدريجيًا. الهبوط ده بيأثر على: • الأوعية الدموية في المخ • مادة السيروتونين (هرمون المزاج) • تنظيم الألم في الجسم

و فى وقت الصيام ضيفي عليهم : • قلة كافيين فجأة (ده لو انتي متعوده علي كوبية القهوة كل يوم) • جفاف • سكر دم منخفض

النتيجة؟ صداع بييجي وقت العصر أو قبل المغرب بشوية.

نمنع ده إزاي؟

قللي الكافيين تدريجي قبل رمضان عشان تعودي جسمك
اشربي ٣ لتر مية بين المغرب والفجر يوميا عشان تقللى الجفاف
زودي من مغنيسيوم طبيعي (سبانخ، لوز، كاكاو خام)
ما تعليش السكر في الإفطار فجأة (يعني من الاخر بلاش نفطر بحلويات رمضان و نخليها لبعد العشاء)
نامي كويس يوميا مش اقل من ٨ ساعات

لو حسيتي ان الصداع ماسكك و لسه ناقص شويه علي الافطار، ممكن تغسلي وشك بميه ساقعة و تقعدي في مكان هادي و ضلمة، عشان تقللي من حدته.

لو الصداع ملازمك و بيكون شديد جدًا أو بيجيلك صداع نصفي، لازم تتابعي مع دكتور لاستبعاد اي امراض مسببة