الدورة وقفت؟اسباب غياب الدورة الشهرية .

على قد ما الدورة الشهرية ممكن تلخبطنا لما بتيجي، غيابها أحيانًا بيخلينا نقلق أكتر. يا تري ايه السبب وراء انقطاع الدورة الشهرية المفاجئ؟

انقطاع الدورة الشهرية (أمينوريا) هو غياب الدورة الشهرية لمدة 3 شهور أو أكتر عند ست كانت دورتها منتظمة قبل كده.

في أوقات كتير ممكن يكون ده أمر طبيعي زي في فترة الحمل أو الرضاعة او يكون بسبب وسيلة منع الحمل زي الحبوب اواللولب اللي ممكن يمنع نزول الدورة، لكن أحيانًا ممكن يكون مؤشر على مشاكل صحية محتاجة متابعة مع دكتور.

أسباب انقطاع الدورة الشهرية:

• تغيرات هرمونية الهرمونات بتلعب دور كبير في تنظيم الدورة الشهرية. أي خلل في هرمون الاستروجين أو البروجسترون ممكن يسبب غياب الدورة. ده ممكن يحصل مع حالات زي متلازمة تكيس المبايض أو مشاكل الغدة الدرقية أو انقطاع الطمث المبكر.

• نمط الحياة والنظام الغذائي التوتر المستمر أو الإجهاد البدني الشديد، زي التمارين الرياضية المكثفة والوزن القليل -خاصة الستات اللي بيعانوا من اضطرابات الأكل زي فقدان الشهية العصبي (أنوركسيا) أو الشره المرضي (بوليميا)- ،ممكن تأثر على توازن الجسم وهرموناته وتوقف الدورة الشهرية مؤقتًا.

• مشاكل في الجهاز التناسلي زي التصاقات في الرحم المعروفة باسم متلازمة اشرمان و دي حالة نادرة بتحصل بعد الولادة القيصرية و عملية كحت الرحم

لو شاكه ان عندك امينوريا بننصحك تستشري دكتور عشان يساعدك تعرفي السبب وراء المشكلة و تعالجيها، في الأغلب الدكتور هيطلب منك فحوصات دم زي اختبار حمل و تحاليل وظائف الغدد و المبيض عشان يحدد لو السبب خلل هرموني او حاجة تانية او ممكن يطلب أشعة.