الرئيسية
سرطان الثدي: اشارات وخطوات
ايه هي أورام الثدي؟
أورام الثدي عبارة عن نمو خلايا الثدي بسرعة كبيرة و تغير خصائصها الطبيعية لتكوين أورام حميدة (غير سرطانية) أو خبيثة (سرطانية)، اللي يفرق ما بين الورم الحميد والخبيث هو سرعة تكاثر الخلايا و قدرتها على الانتشار في باقي أعضاء الجسم.
سرطان الثدي هو ورم خبيث بيجي اكتر للستات فوق سن ال٤٠ في ثدي واحد أو الاثنين في نفس الوقت، مفيش داعي للخوف ، لأن العلم تقدم ونسبة الشفاء عالية.
ايه الاعراض المحتملة اللي تخليني اشك؟
تختلف الأعراض على حسب مرحلة المرض، أغلب السيدات معندهمش أعراض في بدايات المرض.
الاعراض اللى ممكن نحس بيها أو نلاحظها هى:
- تغيرات في حجم و شكل و ملمس الثدي زى كتل، كلكوعة أو بلية تحت الثدي
- إفرازات في الأغلب حمرا من الحلمة.
- تغيرات في شكل و ملمس الحلمة والجلد زي مثلا احمرار أو ظهور تجاعيد
- آلام غير معتادة في الثدي ( في أغلب الأوقات بيظهر العرض ده في المراحل المتأخرة للمرض)
لو شكيتي في أي عرض، استشيري طبيب مختص.
مهم جدا التشخيص المبكر اللى بيزود نسب الشفاء، عشان كده الفحص المبكر جزء مهم من الوقاية من سرطان الثدي، بنعملوا من غير ما يكون في اعراض عشان اطمن على نفسي.
لو عمرك فوق ال ٢٠ يبقي لازم تكوني عارفة عن الفحص الذاتي. أحسن وقت تعملِي في الفحص الذاتي بيكون بعد الدورة الشهرية، مرة كل شهر ، اتبعي الخطوات ديه
- قدام المراية، بصي على نفسك ولاحظي لو في أي تغييرات في الشكل أو الحجم للثدي
- استخدامي صوابعك ، حسي على ثدييك بحركات دائرية، ودوري ْعلى أي كتل أو مناطق غير طبيعية.
- عيدي اول خطوتين وانتي رافعه ايد فوق راسك.
- اضغطي بلطف على الحلمتين ولاحظي خروج أي إفرازات غير طبيعية.
- نامي على السرير، و بايدك الشمال افحصي الثدي اليمين وايدك اليمين افحصي الثدي الشمال. اتأكدي انك فحصتي كل الثدي من الباط لحد منتصف الصدر. لو سنك فوق ال ٤٠ الأطباء بينصحوا بالأشعة الدورية زى بالماموجرام (الأشعة السينية للثدي) سنويا. لو عندك تاريخ مرضي في العائلة و سنك فوق ال٣٠، اهتمي بالأشعة الرنين المغناطيسي بعد توصية الدكتور المعالج.