الرئيسية
التهابات مجرى البول: المختصر المفيد
التهابات مجرى البول شائعة جدًا، خصوصًا عند الستات. حوالي نص الستات هيجلييهم التهاب في المسالك البولية في مرحلة معينة من حياتهم. بس السؤال المهم هنا: ليه ده بيحصل؟ وايه الاسباب اللي بتخلي الالتهاب ده شائع كده؟
السبب الأساسي هو إن مجرى البول عند الستات أقصر من عند الرجالة، وده بيسهل على البكتيريا إنها توصل بسرعة للمثانة وتبدأ الالتهاب. كمان عوامل تانية بتساعد على الإصابة، زي:
- النظافة الشخصية أو استخدام منتجات تسبب تهيج
- تأخير التبول لفترات طويلة
- احتباس البول في المثانة لفترات طويلة
- ضعف المناعة أو وجود مشاكل صحية ثانية
أعراض التهاب المسالك البولية
- حرقان أو ألم أثناء التبول
- التبول المتكرر لكن بكميات صغيرة
- تسريب البول بسبب حاجة مفاجئة للتبول (اتزنقتي)
- ألم في منطقة البطن على جوانب أو أسفل الظهر
- بول ريحته وحشه أو شكله غريب (معكر أو فيه دم)
- في بعض الحالات، ممكن يكون في سخونة لو الالتهاب وصل للكلى
التشخيص بيكون في الأساس على الأعراض، وكمان بيعملوا تحليل بول عشان يتأكدوا من وجود التهاب. وفي بعض الحالات، ممكن يحتاجوا يعملوا مزرعة بول عشان يعرفوا نوع البكتيريا بالظبط، وعلى أساسها بيتحدد العلاج المناسب. معظم التهابات المسالك البولية بتتعالج بكورس مضادات حيوية. ومهم جدًا ناخد الكورس كله حتى لو الأعراض اتحسنت.
ازاي تقللي فرص الإصابة؟
- اشربي مياه كتير طول اليوم (مش اقل من ٨ كوبيات) عشان تنظفي مجرى البول
- اهتمي بنظافتك الشخصية، خصوصًا بعد التبول .
- متأخريش في التبول لما تعوزي تدخلي الحمام.(متزنوقيش نفسك)
- ابعدي عن استخدام المعطرات أو المنتجات الكيميائية اللي ممكن تسبب تهيج
- امسحي منطقة الفرج من قدام لورا لتجنب نقل البكتيريا من فتحة الشرج لمجرى البول
- قللي من اللبس الضيق، خصوصًا البناطيل الجينز أو لباس الداخلي المصنوع من مواد صناعية، عشان بيخلي المنطقة مفيهاش تهوية فيزود الرطوبة بيساعد على نمو البكتيريا
- اشربي عصير التوت البري (كرانبري) اللي بيساعد في تقليل فرص الإصابة بالتهابات المسالك البولية ويخفف من الأعراض لو حصل التهاب.
