ازاي تغذي جسمك صح قبل الدورة؟

في الأسبوع اللي قبل الدورة الشهرية، جسمك بيكون في مرحلة اسمها المرحلة اللوتينية – ودي مرحلة بيزيد فيها هرمون البروجستيرون، التغيرات دي بتأثر على مزاجك، طاقتك، وحتى شهيتك، وممكن تحسي بأعراض زى

انتفاخ في البطن
إرهاق عام
حساسية في الثدي
تقلبات مزاجية
رغبة في الأكل (خصوصًا السكريات والنشويات)

الخبر الحلو؟ التغذية بتساعد بشكل كبير في تقليل أعراض الدورة الشهرية وتنظيم الهرمونات. الدراسات بتأكد إن الأكل الصح بيفرق في تخفيف أعراض المتلازمة ما قبل الطمث (PMS).

زودي الماغنيسيوم و جربي الكركم الماغنيسيوم بيقلل التوتر والانتفاخ، وبيساعد في تحسين النوم. تلاقيه في المكسرات (خصوصًا اللوز والجوز) و الشوكولاتة الداكنة (بنسبة ٧٠٪ أو أكتر) و السبانخ والبقوليات. اما الكركم فيه مادة اسمها “كركمين” ودي بتساعد في تقليل أعراض ما قبل الحيض زي التوتر والمزاج السيء.
اختاري كربوهيدرات معقدة: بدل ما تلجأي للحلويات، اختاري مصادر طاقة بتهضم ببُطء وتثبت السكر في الدم، زي الشوفان، البطاطا الحلوة، الفريك أو الكينوا.
اهتمي بالبروتينات: البروتين بيساعد في توازن السكر في الدم والشبع، جربي الزبادي الطبيعي أو اليوناني (ممكن تضيفي عليه معلقة عسل أو قرفة)، البيض أو العدس أو الفراخ المشوية.
البوتاسيوم لتقليل الانتفاخ: زودي فواكه زي الموز،الأفوكادو او الخيار و ابعدي عن البقوليات زي الفول والطعمية.
قللي الملح والمقليات: الأكل المالح والمقلي بيحبس السوائل وبيزود الشعور بالتقل وعدم الراحة.
خدي بالك من الكافيين: الشاي والقهوة بترفع التوتر وساعات تزود العصبية. جربي تقلليهم أو تستبدليهم بمشروبات مهدئة زي النعناع أو القرفة.