الصيام و الحمل فى رمضان

رمضان دايمًا له طعم خاص… روحانية، لمّة، إحساس إنك جزء من حاجة كبيرة حوالينك. ولو إنتِ حامل، طبيعي جدًا تحسي بحيرة: “أصوم؟ ولا أفطر؟” “هينفع مع البيبي؟” “طب لو كل اللي حواليا صايمين؟”

خليني أقولك أهم نقطة من البداية: الدين مديكي مساحة ومرونة كاملة.

ايه الحالات اللي الصيام مش امن فيها؟

لو عندك: • أنيميا شديدة • مشاكل في الغدة الدرقية • سكر و ضغط الحمل • تاريخ بولادة مبكرة • نقص وزن ملحوظ سواء فيكي او الجنين. • حمل في توأم • أو أي مضاعفات في الحمل

في الحالات دي، الصيام ممكن يكون ضغط إضافي على جسمك و ممكن يعرضك انتى و الجنين لخطر.

اتكلمي مع دكتورك قبل ما تاخدي القرار. لان هيديكى قرار مناسب لحالتك و مبنى علي

تاريخ حملك و تاريخك المرضى
وزنك
نمط حياتك
إنتِ في أنهي أسبوع
هل حصلت مضاعفات قبل كده؟

ومن هنا يقدر يحدد هل الصيام آمن ليكي و لا لا. ومش شرط تصومي الشهر كله. ممكن تصومي أيام وتفطري أيام حسب قدرتك.

مع صيامك راقبي علامات الجفاف، اللى لازم تاخدي بالك منها زي: • بول لونه غامق • دوخة • صداع • ضعف عام • خفقان

و لو ظهرت أي علامة من دول… افطري فورًا. مفيش بطولة في إنك تكملي وإنتِ منهكة. راقبي حركة البيبي يوميًا.لو لاحظتي انها قلت بشكل ملحوظ وقت صيامك… لازم تفطري وتتواصلي مع طبيبك فورًا.

متنسيش مكملاتك، حتى لو صايمة، خدي وقت السحور او بعد فطار: • حمض الفوليك • فيتامين د • أي مكملات وصفها لكِ الطبيب

طب علميًا… هل الصيام بيأثر؟

الأبحاث لحد دلوقتي بتقول إن:

مفيش تأثير واضح على وزن المولود
مفيش زيادة مؤكدة في الولادة المبكرة
مفيش دليل كافي إنه بيزود القيصرية
مفيش دليل قوي إنه بيزود سكر الحمل
أو تسمم الحمل

لكن ده لا يعني إن كل الحالات زي بعض. كل حمل مختلف… وكل جسم مختلف.

خليكي فاكرة، لو صومتي… صومي بوعي، بعد استشارة دكتورك. ولو فطرِتي… افطري براحة ضمير لان اختيارك إنك تحافظي على صحتك وصحة البيبي عبادة برضه

وفي الحالتين… إنتِ أم شاطرة بتاخدي القرار الصح لبيبي الصغير اللي جواها.