اكل ايه وقت الدورة؟
في وقت الدورة الشهرية، جسمك بيعدّي بتغيّرات كبيرة، وده ممكن يخلي اليوم تقيل ومليان تعب، تقلصات، انتفاخ أو حتى تقلبات مزاج. بس فيه خبر حلو: الأكل ممكن يفرق فعلًا!
النظام الغذائي السيء ممكن يزود من حدة أعراض الدورة الشهرية. خصوصا الأكل اللي فيه سكريات عالية ودهون مشبعة اللي بيزود الالتهابات وبلخبّط توازن الهرمونات، وده ممكن يأثر على انتظام الدورة الشهرية.
تعالي نعرف مع بعض إيه أفضل العادات الغذائية اللي هتساعدك ترتاحي وتعدّي وقت الدورة بأقل تعب ممكن.
المياه
اشربي كمية كفاية من المياه علشان تتجنبي الصداع اللي بييجي من الجفاف وكمان علشان تقللي الانتفاخ. جسمك محتاج حوالي ٣ لتر مياه في اليوم علشان يعوّض السوائل اللي بتفقديها.
الفاكهة و الخضار
كل واحد فينا محتاج ياكل على الأقل ٥ حصص من الفاكهة والخضار المتنوّعين كل يوم. التنويع مهم علشان الجسم يستفيد من أكبر قدر من الفيتامينات والمعادن. الفواكه والخضار وقت الدورة بتخفف من الرغبة الشديدة في الأكل وبتديكي طاقة زي
- الموز فيه فيتامين B6 وبوتاسيوم، وده بيساعد يقلل الانتفاخ والتقلصات
- البطيخ والفواكه اللي فيها نسبة مياه عالية بيرطبوا الجسم وبيقللوا الإحساس بالتعب
- البطاطا الحلوة: مصدر ممتاز لفيتامين A وماغنيسيوم، بيساعدوا على تنظيم الهرمونات
- الخس والجرجير و الفراولة والتوت البري: مليانين مضادات أكسدة، بيقللوا الالتهابات ويحسنوا المزاج
- البنجر: بيرفع نسبة الحديد في الدم، وبيقلل الدوخة والتعب
الزنجبيل و شاي النعناع
الزنجبيل بيقلل الالتهابات، وده معناه وجع أقل. الدراسات بتقول إن من ٧٥٠ ٢٠٠٠ مجم من الزنجبيل يوميًا في أول ٣–٤ أيام من الدورة بيقلل الألم. اما النعناع الطبيعي بيرخي عضلات الرحم وبيقلل الألم وكمان بيساعد في تقليل الغثيان ومشاكل الهضم اللي بتحصل مع البريود.
الشوكولاتة الداكنة
الشوكولاتة الغامقة مش بس بتصلّح المزاج، لكن كمان بتقلل من الام الدورة، في دراسة اثبت إن أكل ٤٠ جم من شوكولاتة داكنة (نسبة كاكاو ٧٠%) يوميًا أول ٣ أيام من الدورة بيقلل الألم بشكل كبير. وكمان بتديكي الماغنيسيوم والنحاس اللي جسمك محتاجهم.
العدس، الفاصوليا والمكسرات
البقوليات والمكسرات مليانة بروتين، وده بيساعدك تحافظي على مستوى السكر في الدم ويحسّن طاقتك. وكمان غنية بالحديد اللي بيقلل الإحساس بالتعب.
الزبادي
الزبادي مفيد لأنه فيه بكتيريا نافعة (probiotics) بتحارب الالتهابات اللي ممكن تحصل وقت الدورة. أما التوفو (مصدر نباتي ممتاز)، فيه حديد وماغنيسيوم وكالسيوم – عناصر مهمة جدًا للجسم في المرحلة دي.