سرطان الثدي:سين و جيم
بيجي منين سرطان الثدي و ايه مسبباته؟
مفيش سبب واضح ليه… عشان خلايا الثدي بتتغير لخلايا سرطانية لكن فى عوامل كثيرة بتزود نسب الإصابة بالمرض زى:
- التقدم في العمر والسمنة، و شرب الكحوليات بكثرة والتدخين
- وجود تاريخ مرضي بسرطان الثدي في العائلة أو جينات متوارثة
- العلاج الهرموني لمرحلة المينوبوز (انقطاع الدورة)
ازاى امنع /اقلل من نسبة حدوث سرطان الثدي ؟
لو اتبعتي نظام صحي متوازن هتساهمي بنسبة كبيرة انك تقللي من العوامل اللي بتزود نسبة الإصابة.
- خلي وجباتك متوازنة و حاولي تحافظي على وزن مناسب، وقفى التدخين وشرب الكحوليات
- مارسي الرياضة بانتظام زي ٣٠ دقيقة مشي يوميا
- انتظمي في الفحوصات الشهرية والسنوية
الابحاث اثبتت ان الحمل والولادة والرضاعة الطبيعية بيقللوا من خطر الإصابة بسرطان الثدي و لو عندك تاريخ مرضي في العائلة في بعض الادوية ممكن تقلل من نسبة حدوث السرطان، استشيري دكتورك عشان تعرفي هي مناسبة ليكي ولا.
ايه علاقة سرطان الثدي بالدورة الشهرية؟
- دورتك الشهرية بتنظمها هرموناتك، لما بيحصل تغيرات في هرمونات الجسم، بالاخص الإستروجين والبروجستيرون، بيحصل بالتدريج تغيرات في شكل وحجم الثدي، عشان كده لما نسب هرمون الاستروجين تزيد عن الطبيعي لفترات طويلة أو حصل اضطراب، نسبة الإصابة بسرطان الثدي بتزيد.
- كمان الأبحاث ربطت بين سن البلوغ و المينوبوز (انقطاع الدورة) ونسبة حدوث سرطان الثدي، يعني لو الدورة بدأت في سن صغير أو وقفت متأخر عن الطبيعي (بعد سن ٥٥) ، ده بيزود من مدة تداول الهرمونات في الجسم اللى بالتالي هتزود من نسبة الإصابة بسرطان الثدي.
- سرطان الثدي نفسه مش بيأثر على مواعيد أو كمية دم الحيض لكن في بعض العلاجات زى العلاج الكيماوي أو أدوية حجب الإستروجين ممكن توقف الدورة الشهرية مؤقتا أو نهائيا.
هو في علاقة ما بين حبوب منع الحمل وسرطان الثدي؟
في بعض الأبحاث ظهر أن استخدام بعض حبوب منع الحمل، وخاصة على فترات طويلة أو في سن صغير ارتبط بزيادة خطر الإصابة بسرطان الثدي، لكن النسبة ضعيفة جدا، عشان كده مهم جدا تتكلمي مع الطبيب المختص عن المخاطر والفوائد المرتبطة بحبوب منع الحمل أو أى وسيلة تانية.
اروح فين لو شكيت او عندي أعراض ؟
في معاهد ومستشفيات في مصر متخصصة للتشخيص والعلاج منهم:
- معهد القومي للأورام- بجامعة القاهرة
- مستشفى الجامعي بكلية طب القصر العيني
- مستشفى الجامعي بكلية طب عين شمس (الدمرداش)
- مؤسسة بهية
- المؤسسة المصرية لمكافحة سرطان الثدي
وفي اماكن تانية تابعة لحملة ١٠٠ مليون صحة تحت مبادرة صحة المرأة. شوفي اقرب مكان ليكي من على الموقع هنا https://www.100millionseha.eg.