الرئيسية
هرمونات الحمل: بيحصل إيه في جسمك؟
من أول أيام الحمل، جسمك بيبدأ يشتغل بنظام جديد تمامًا، لأن المشيمة بتتكوّن والمخ بيبعت إشارات للغدد، وهرمونات كتير بتعلى وتقل علشان تحافظ على الحمل وتجهز جسمك للأشهر الجاية. الهرمونات دي هي السبب الأساسي في معظم الأعراض اللي بتحسي بيها في أول تريمستر.
أهم هرمونات الحمل بتشمل:
- هرمون الحمل (hCG): ده أول هرمون بيظهر وده اللي بنقيسه في تحليل الحمل، بيطلع من المشيمة بعد انغراس البويضة في الرحم. وظيفته تثبيت الحمل، منع نزول الدورة، تحفيز إفراز البروجسترون، والحفاظ على كيس الحمل. أعراضه تشمل غثيان وقيء، دوخة، حساسية للروائح، وتقلب مزاج، وأعلى مستواه بيكون في الأسبوع 8–10 وبعدها يبدأ يقل تدريجيًا.
- البروجسترون (هرمون التثبيت): من أهم هرمونات الحمل، وبيتم إنتاجه في الأسابيع الأولى من جسم الجسم الأصفر (Corpus Luteum)، وبعد الأسبوع 8–12 بيبدأ المشيمة تتولى إنتاجه. البروجسترون له دور كبير في تثبيت الحمل لأنه:
- بيحفّز نمو الأوعية الدموية اللي بتغذي بطانة الرحم، وبيخليها تفرز عناصر غذائية لتغذية الجنين في مراحله الأولى.
- بيمنع انقباض العضلات الرحم علشان الرحم يكبر مع نمو الجنين.
- مع الإستروجين، بيشجع نمو الثدي وتطوير قنوات اللبن، لكنه يمنع إفراز اللبن أثناء الحمل، والرضاعة تبدأ بعد الولادة لما مستواه يقل.
- كمان بيساعد في تجهيز الجسم للولادة عن طريق تقوية عضلات الحوض اللازمة للمخاض.
أعراض زيادة البروجسترون ممكن تشمل نعاس شديد، إمساك، حموضة، انتفاخ، شعور بالكسل، وحتى زيادة نمو الشعر.
- الإستروجين: هرمون النمو والتغييرات في الحمل، وظيفته تكبير حجم الرحم، زيادة تدفق الدم، المساهمة في نمو المشيمة، وتحسين وصول الأكسجين للجنين. أعراضه تشمل تغيرات في الجلد، كلف الحمل، احتقان الأنف، وزيادة الإفرازات المهبلية.
- هرمون الريلاكسين (Relaxin): أقل شهرة لكنه مهم جدًا، وظيفته إرخاء الأربطة والمفاصل، تجهيز الحوض للولادة، ومساعدة الرحم على التمدد. أعراضه تشمل ألم في الظهر والحوض، عدم ثبات في المفاصل، وشد في الأربطة. البرولاكتين: هرمون الرضاعة، وظيفته تجهيز الثدي لإنتاج اللبن ونمو الغدد اللبنية. أعراضه تشمل تورم الثدي وأحيانًا إفرازات بسيطة.
- الأوكسيتوسين (Oxytocin): هرمون مهم جدًا أثناء الولادة والرضاعة، بيظهر بكميات قليلة خلال الحمل وبيزيد بشكل كبير أثناء المخاض، لأنه المسؤول عن انقباضات الرحم اللي بتساعد على خروج البيبي، وكمان بيساعد على إفراز اللبن بعد الولادة.
كل عرض بتحسي بيه تقريبًا في أول الحمل له تفسير هرموني. جسمك بيشتغل على أعقد مشروع في الدنيا: تكوين إنسان جديد.