مستلزمات الدورة الشهرية

سواء كنتي جديدة في تجربة منتجات الدورة الشهرية أو عايزة تجربي حاجة مختلفة عن اللي متعودة عليه، المقال ده ليكي! هنتكلم ببساطة عن كل الخيارات المتاحة، من الفوط الصحية لحد سروال الدورة الشهرية (البيريود اندروير)، مع مميزاتها وعيوبها، علشان تقدري تختاري اللي يناسب جسمك واحتياجاتك بكل سهولة.

- ١. الفوط الصحية (Pads)

المميزات: سهلة الاستخدام وبتناسب جميع الاعمار وموجودة في كل الصيدليات والمحلات باسعار اقتصادية. بتيجي بمقاسات متنوعة (صغيرة، متوسطة، كبيرة) وأنواع مختلفة (عادية، ليلية، مع أجنحة، بدون أجنحة)، علشان تناسب احتياجاتك خلال أيام الدورة المختلفة. العيوب: ممكن تحسي بعدم الراحة أو شوية حساسية لو استخدمتيها لفترة طويلة، خاصة في الحر. لو ما اتغيرتش بانتظام، ممكن تتسبب في ظهور ريحة وحشة. كمان عدم تغييرها بانتظام بيزيد من خطر الالتهابات الجلدية وتراكم البكتيريا، وده ممكن يسبب حكة أو طفح جلدي. عشان تتجنبي العيوب دي مهم

• تغيري الفوطة الصحية كل 4 لـ 6 ساعات
• تنجنبي استخدام الفوط المعطرة لأنها ممكن تأثر على توازن الحموضة في المهبل وتسبب تهيج للبشرة. في بدالها فوط بتمتص الروائح هتديكى نفس المفعول.

- ٢. البريود اندروير (Period Panties)

إيه هي؟ دي شورتات داخلية عادية لكن معمولة بطبقات قطن ماصة بتمنع أي تسريب. بتلبسيها لوحدها أو مع منتج تاني حسب كمية التدفق. المميزات: مريحة جدًا، صديقة للبيئة، وبتغنيكِ عن الفوط الصحية في الأيام الخفيفة. العيوب: لازم يكون عندك أكتر من واحدة عشان تبدلي خلال اليوم، وتحتاجي تغسليها كويس، فممكن تكون مرهقة شوية. النوعين التانيين من الانواع الي بتحتاجي تدخليها جوه المهبل/ الجسم زي

- ٣. التامبونز (Tampons)

المميزات: صغيرة وسهلة الحمل، ومش بتحسّي بيها أثناء الحركة أو الرياضة. مناسبة لو ناوية تنزلي بحر أو حمام سباحة. العيوب: محتاجة تدريب عشان تستخدميها صح، ولازم تغيريها كل 4-6 ساعات لتجنب الالتهابات أو الـ Toxic Shock Syndrome (حالة نادرة لكن خطيرة). بعض البنات أو الأمهات بيكون عندهم قلق من المنتجات اللي بتُستخدم داخليًا، زي التامبونز والكؤوس الشهرية. مهم تفهمي جسمك وتسألي مصدر موثوق لو عندك أي قلق.

- ٤. الكأس الشهري

المميزات: اقتصادي وصديق للبيئة لأنه بيتعاد استخدامه لمدة تصل لـ 5-10 سنين. بيديلك حماية لفترة أطول (لحد 12 ساعة). العيوب: سعره غالي في الأول (250 لـ 500 جنيه)، وبيحتاج تدريب عشان تعرفي تركبيه وتشيليه بسهولة. المخاوف: زي التامبون، فيه بنات بتقلق من استخدام الكأس بسبب إدخاله داخل الجسم، فلو مش مرتاحة أو لسه مترددة، خدي وقتك واقرأي عنه أكتر.