الدورة جت بدري ؟ ايه الي حصل
بتتابعي دورتك، وفي مرة الدورة جاتلك بدري وقلقتي عشان مش عارفة السبب؟
ما تخافيش، كتير من البنات بيلاقوا إن الدورة الشهرية بتنزل عندهم بدري عن الميعاد المتوقع، وده ممكن يكون له أسباب مختلفة.
في فترة البلوغ، خصوصًا أول ٣ سنين بعد نزول أول دورة، جسمك بيكون لسه بيتعرف على التغيرات الهرمونية الجديدة، وده بيخلي الدورة ساعات تيجي بدري أو تتأخر شوية.
اتأكدي الأول إنك متابعة دورتك كويس، عشان ساعات بيكون إنك فاكراها جاية بدري، بس ده هو معادها الطبيعي.
لكن لو دورتك كانت منتظمة وفجأة جت بدري، فيه أسباب بسيطة ومؤقتة ممكن تفسر ده، زي:
- تغير في نظام أكلك: لو فجأة خسيتي أو تخنتي.
- ممارسة رياضة جديدة أو تغيير مجهودك اليومي. تغير مواعيد نومك أو قلة الراحة.
- التوتر والضغط النفسي: لو فيه حاجة مضايقاكي أو قلقاكي، ده من أكتر الحاجات اللي بتلخبط مواعيد الدورة.
- ممكن كمان يكون ده مش دورة حقيقية: أوقات بيحصل تنقيط خفيف في فترة التبويض، لونه بيكون وردي خفيف أو بني، وكميته قليلة.
لما الدورة تيجي بدري، ده ممكن يأثر عليا إزاي؟
لو الدورة بتنزل كتير أو لفترات طويلة (أكثر من مرة واحدة في الشهر)، ممكن يحصل نقص في الحديد وأنيميا. ممكن كمان يأثر على الحياة اليومية ويسبب صعوبة في الانتظام بالمدرسة. لو لقيتي إن الموضوع بيتكرر كتير، أو الدورة بقت تيجي معاها أعراض مش طبيعية، ده ممكن يكون علامة على حاجة محتاجة متابعة، زي:
- مشاكل في الغدة الدرقية (نشاط أو خمول).
- تكيسات على المبيض.
- بطانة الرحم المهاجرة (حاجة بتسبب ألم شديد وعدم انتظام الدورة).
طيب، إمتى أروح للدكتور؟
لو لقيتي الموضوع بيتكرر أكتر من مرة أو مرتين، أو كمية الدم كانت كتيرة جدًا ومعاها أعراض زي الدوخة أو الخمول، أو لو الألم مع الدورة بيكون شديد ومأثر عليكي في يومك العادي، أو حتى لو عدت ٣ سنين من بداية أول دورة ولسه مش منتظمة، ساعتها يفضل تروحي لدكتورة علشان تطمني وتاخدي النصيحة الصح.