ازاي تقللي من الحبوب الهرمونية ؟

بقلم : بسمة شريف الحداد

مين فينا مجربتش لحظة التحضير لمناسبة ممتعة او حضور إنترفيو مهم وكلها استعداد ونشاط بس فجأت تكتشف حباية او اتنين ظهرو من العدم غيرو مزاج اليوم؟ يا سلام بقي لما يكون مصاحب معاها الأسبوع المميز في الدورة ويبدأ السؤال: هو جسمي ماشي ضدي ليه؟

أحب اقولك انه جسمك اكتر حاجة ماشية مع مصلحتك بس لو فهمناه صح وعرفنا السبب وراء كل ردة فعل منه هنكتشف إنها ديناميكية كيمائية مبهرة. أفضل وسيلة للتعامل معاها هو اننا نفهم الأسباب ونتلاشى كل ما قد يسبب مضاعفات. وده بالظبط اللي هنتعرف عليه دلوقتي

الاول ايه فرق ما بين الحبوب الهرمونية عن حب الشباب العادي

رغم إن الاتنين بيظهروا على شكل حبوب في البشرة، إلا إن سبب ظهورهم ومكانهم وطريقة التعامل معاهم ممكن تختلف.

• حب الشباب الهرموني: بيحصل بسبب تغيرات أو اضطرابات في الهرمونات، وبيكون شائع خلال البلوغ، قبل الدورة الشهرية، أثناء الحمل، بعد الولادة، أو مع بعض الحالات زي تكيس المبايض. علامته:

• بيظهر غالبًا في الجزء السفلي من الوجه: الذقن، الفك، وحول الفم.

• بيكون على شكل حبوب عميقة ومؤلمة تحت الجلد.

• بيزيد أو يسوء قبل الدورة الشهرية بأيام. ممكن يكون مصحوب بأعراض تانية زي عدم انتظام الدورة، زيادة الشعر في أماكن غير معتادة، أو تساقط الشعر

• حب الشباب العادي: غالبًا بيكون مرتبط بانسداد المسام بسبب الدهون الزائدة، تراكم خلايا الجلد الميتة، أو بعض منتجات العناية بالبشرة. علاماته:

• بيظهر أكثر في الجبهة والأنف والخدين (منطقة الـ T-Zone).

• بيكون على هيئة رؤوس سوداء أو بيضاء وحبوب سطحية.

• مش بالضرورة يكون مرتبط بمواعيد الدورة أو التغيرات الهرمونية.

• عادةً بيستجيب بشكل أفضل لروتين العناية بالبشرة والعلاجات الموضعية.

إمتى تشكي إن الحبوب هرمونية؟

لو الحبوب بتظهر أو بتزيد بشكل متكرر قبل الدورة، أو مركزة في منطقة الفك والذقن، أو مصاحبة لأعراض زي عدم انتظام الدورة أو زيادة نمو الشعر، فممكن يكون للهرمونات دور في ظهورها. في أوقات معينة من الدورة الشهرية، تقدري تعرفي اكثر عنه في المقال ده

إزاي نتعامل مع حب الشباب الهرموني؟

علاج حب الشباب الهرموني مش بيقتصر على التخلص من الحبوب الموجودة بس، لكنه بيعتمد على فهم السبب الأساسي اللي ورا ظهورها. لأن طالما السبب الهرموني لسه موجود، الحبوب ممكن تستمر أو ترجع تاني حتى بعد ما تختفي مؤقتًا.

1. العناية بالبشرة

أول خطوة هي الالتزام بروتين بسيط ولطيف على البشرة. استخدام غسول مناسب مرتين يوميًا بيساعد على إزالة الدهون والشوائب من غير ما يسبب جفاف أو تهيج. المبالغة في غسل الوجه أو استخدام منتجات قاسية ممكن تجيب نتيجة عكسية وتخلي البشرة تفرز دهون أكتر. بعض المواد الفعالة اللي ممكن تساعد في التحكم في الحبوب:

• حمض الساليسيليك (Salicylic Acid): بيساعد على تنظيف وتقشير المسام من الداخل وتقليل انسدادها.
• البنزويل بيروكسيد (Benzoyl Peroxide): بيساعد على تقليل البكتيريا المسببة للحبوب وتهدئة الالتهاب.
• الريتينويدات الموضعية: ممكن يوصي بيها دكتور الجلدية للمساعدة في تجديد خلايا البشرة ومنع انسداد المسام، بس خلي بالك انها لازم تتاخد تحت اشراف طبي عشان ممكن تسبب حساسية وتهيج في الجلد لو استخدمت بجرعة غلط. . لو الحبوب شديدة أو مستمرة لفترات طويلة، ممكن تحتاجي لتقييم طبي علشان تعرفي إذا كان في سبب هرموني محتاج علاج متخصص، زي تكيس المبايض أو غيره من اضطرابات الهرمونات.

2. نمط الحياة ليه دور مهم: الدراسات الحديثة قالت إن بعض العادات اليومية ممكن تأثر على شدة حب الشباب عند بعض الأشخاص.

• حاولي تقللي من الأطعمة عالية السكريات والكربوهيدرات المكررة.
• اهتمي بوجبات متوازنة فيها خضروات، فواكه، بروتينات، ودهون صحية.
• اشربي كمية كافية من المياه يوميًا.
• حاولي تحافظي على مواعيد نوم منتظمة، لأن النوم بيلعب دور مهم في تنظيم الهرمونات.
• مارسي أي نشاط بدني مناسب ليكي بشكل منتظم.

3. التوتر والحبوب: التوتر النفسي مش السبب المباشر لحب الشباب، لكنه ممكن يزود شدته عند بعض الأشخاص. ارتفاع هرمونات التوتر زي الكورتيزول بيزود من الالتهابات ونشاط الغدد الدهنية، وده ممكن يخلي الحبوب أكثر وضوحًا أو تستمر لفترة أطول. علشان كده، الاهتمام بالصحة النفسية، والحصول على قدر كافٍ من الراحة، وممارسة أنشطة تساعد على الاسترخاء، كلها عوامل ممكن تدعم صحة البشرة جنبًا إلى جنب مع العلاج المناسب

امتي أروح للدكتور؟

في الحالات اللي بتكون فيها الحبوب شديدة أو مش بتتحسن بالعلاج العادي، لازم يتم اللجوء لطبيب متخصص. الدكتور ممكن يكتب علاجات موضعية أقوى زي الريتينويدات اللي بتنظم تجدد خلايا الجلد وتمنع انسداد المسام، أو مضادات حيوية لتقليل الالتهاب. وفي بعض الحالات، خاصة لو الحبوب مرتبطة بالدورة الشهرية بشكل واضح، ممكن يتم استخدام أدوية بتنظم الهرمونات زي بعض أنواع حبوب منع الحمل، أو أدوية بتقلل تأثير الأندروجينات زي سبيرونولاكتون، وده بيقلل إفراز الدهون ويحسّن الحالة بشكل ملحوظ، لكن لازم يكون تحت إشراف طبي..